ھزدار: زور بیگواھیں کبیر ءِ مات ءَ گوشتگ کہ زوریں بیگواھیانی باروا میان استمان ءُ شرپمندیں راجانی بے تواری بژنی گپے۔ منی زھگ کبیر گوں وتی دگہ دو ھمبل مشتاک ءُ اتااللہ ءَ ھوار پانزہ سال اِنت بیگواہ اِنت۔ کبیر ءُ آئی ھمبلانی زوریں بیگواھی ءَ رستری جیڑہ ءِ سر ءَ پاکستان ءُ میان استمانی مردمی ھکانی گل، آمیدگس ءُ کمیشنانی رویشت ءُ کرد ءَ سک بژن بیت۔
آئی ءَ گوشتگ کہ اے ادارھانی رویشت مردمی ھکانی بنیادی راھبندانی برجاہ دارگ ءَ بے سوب بوتگ اَنت ءُ مردمی ھکانی گل ءُ باسکاں اے وڑیں زوراکیانی بگیری ءَ پہ زوت توار چست کنگ ءَ زور دیاں۔
آئی ءَ دیمتر ءَ گوشتگ کہ مردمی ھکانی ٹاپار جنوک زوریں بیگواھیانی جیڑہ ءِ سر ءَ گامگیج نہ زورگ ءُ مدام بے تواری سانمندیں کھولاں جنجال کنگءُ میارباراں کمک کنگ ءَ اَنت۔ پہ مردمی ھکانی گلاں ھژدری اِنت کہ آ وتی بے تواری ءَ بہ پروش اَنت ءُ پہ انساپ ءُ جست ءُ پرس ءَ گامگیج بزور اَنت، زوریں بیگواھیءُ چکچینی ءِ درگت ءَ پہ درسیں مردمانی پھریزگ ءَ گامگیج بزور اَنت۔
