بلوچستان نا ضلع خضدار ئٹی اینو پریس کانفرنس کرسا پاکستانی لشکر نا دو آن زوراکی ئٹ بیگواہ مروک سلمان ء محمد جان نا خاؤت نا پاننگ اس کہ اینو اسہ پدا نن داڑے سکیورٹی لشکر نا بے قانودی کارین و زوراکی نا سوب آن اسہ پین کسہ ئس نُما مونا بسونن، کنا اِلّہ مار سلمان ء محمد جان، خضدار کھٹان نا ہندی ئے تدوکا سال نومبر 2022 ئٹی سی ٹی ڈی و ڈھکوک ادارہ غا تا کارندہ غاک شال آن دزگیر کرسا بیگواہ کریر۔ ہرا تدوکا اسہ سال آن بیگواہ ءِ۔
او پارے کہ نُمے سما ءِ کہ ننا خاؤت نا ورنا تے اندا وڑ زوراکی ئٹ بیگواہ کننگ ننے تینا وے کروکا ڈوہ تا اشتماعی سزا تننگ نا اولیکو کسہ اف داکان مُست 31 اگست 2018 آ کنا الّہ مار محمدآصف ء محمد پناہ و حافظ عبدالرشید ء عبدالرزاق عمرانی ئے زنگی ناوڑ، نوشکی آن پین نُہہ بندغ تون دزگیر کرسا بیگواہ کننگاسس اوفتا ڈوہ ئے پاننگ و اوفتے عدالت نا مونا پاش کننگ نا جاگہ غا زوراکی ئٹ بیگواہ کرسا تدوکا پنچ سال آن اوفتے بیگواہ تخنگانے و اوفتتون دزگیر و بیگواہ مروک کُل بندغا تے جتا وخت آتیٹ اسٹ اسٹ آ یلہ کننگا۔
او پارے کہ داکان بیدس ننا خڑک ئنا سیال عبدالمنان و سرفراز ئے 30 اکتوبر 2022 آ فورسز آک خضدار آن دزگیر کرسا اول بیگواہ تخار و پدان ننا برانز آتا سوب آن 10 نومبر 2022 آ سی ٹی ڈی نا ذریعت ئٹ اوفتا دزگیری ئے کوئٹہ نا خڑک آن پاش رسا اوفتیا دروغ ئنا کیس خلنگا۔ و دہ دے ئنا زوراکی ئٹ بیگواہی و جسمانی و ذہنی ازیت تننگ ئٹ عبدالمنان و سرفراز آن سلمان ء محمد جان، کٹھان خضدار نا ہندی نا بر خلاف بیان ترفسا اودے ہم دافتتون اوار پاننگا۔
او پاریر کہ سلمان انجینیرنگ یونیورسٹی خضدار ئٹی عارضی ملازم اس انٹرویو کال بننگ آن گڈ اونا انٹرویو ہم مسس مُستی اونا ملازمت پکی مروئی اس ولے اونا FSc نا سند آک گوئنگاسر و ملازمت کن ہمو ڈاکومنٹ آتا مننگ المی اس اندا سوب آن او ہمو ڈاکومنٹ آتیکن کوئٹہ بورڈ آفس ہناسس ولے دزگیر مروک عبدلمنان و سرفراز نا تشدد نا ذریعت ئٹ سلمان ئے پن کننگ آن پد سلمان ئے کوئٹہ آن فورسز آک نومبر 2022 آ بیگواہ کریر ہموکان گڈ او بیگواہ ءِ۔ اینو اسکان اودے ہچو عدالت ئسے ٹی ہتنگ متنے۔ سلمان نا دزگیری و بیگواہی ئے داسا اسہ سال ئس مسنے۔
او ودیک پارے کہ نن بندغی حق آتا ادارہ آتیان ہم سلمان کن انصاف کن کمک نا خواست کینہ۔ دا تو کُل ئے سما ءِ کہ فورسز آتا کارندہ غاک قانودی وڑ ئٹ ہچو بندغ ئسے دا وڑ زوراکی ئٹ بیگواہ کننگ کپسہ ولے ولے داڑے طاقتور سکیورٹی فورسز آک قانود و انصاف نا ادارہ غا تا مونا جوابدہی آن بالاتر ءُ، فورسز آتے دوئی مروک دا استثنیٰ ئے ایسر مروئی ءِ۔ نہ بیرہ زوراکی نا بیگواہیک بنداوی بندغی حق آتا سخت لتاڑ ءُ بلکہ دا بندغی نا برخلاف اسہ ڈوہ ئس ءِ۔
او ایسر ئٹ پارے کہ دا پریس کانفرنس نا ذریعت ئٹ اسہ وار پدا خواست کینہ کہ سلمان ئے زوت پاش کننگ مرے و اودے زوت آجو کرسا ننے انصاف تننگ مرے۔ اگہ سلمان نا برخلاف ڈوہ ئسے ٹی تُد مننگ نا شاہدی مسکہ تو دائسکان اودے عدالت آتیٹ ہتنگاکہ۔ ننے دا وڑ دڑد و ازیت تننگ مف سلمان نا باوہ و لمّہ تینا مار ئنا زوراکی نا بیگواہی آن بھاز فریشان ءُ۔
