بلوچستان نا بنجائی شار شال ئٹی زوراکی نا بیگواہی تا برخلاف وائس فار بلوچ مسنگ پرسنز نا برانزی کیمپ 5118 می دے برجاء سلیس۔
قلات آن سیاسی و چاگڑدی باسک اللہ بخش مینگل نبی بخش دہوار بلوچ و ایلو کیمپ برسا خاؤت آتون اواری نا درشانی کریر۔
دا وخت آ وی بی ایم پی نا وائس چیئرمین ماما قدیر بلوچ پارے کہ کُل آن بھلا ہیت دادے کہ انقابی تنظیم آتیٹ موقع پرستی نا گنجائش مف، ہر گھام آ ہُشار مروئی ءِ۔ درباری زہنیت ءِ تینا نیام آن کشوئی تمو۔ الس و باز سیاسی شخصیت آتون خُڑکی کن قوم ئنا مفاد آتے یلہ کروئی اف۔ بیشک ننا کچ پین کم مرے داڑان فرخ تمپک ولے اسہ وار موقع پرست آک ننا نیام ئٹ جاگہ کریر او اختلاف المی ودی کرور دننگا بندغ آتا تربیت پین ماحول ئسے ٹی مسنے۔
او پارے کہ دا پاننگ رد مروف کہ لکھ آتا کچ بلوچ آتا خون و جوزہ آتا بنداو آ ہرا نرگیت نا بنداو تخنگ مننگ ءِ دا تباہی اسے۔ دادے توننگ کن ہراڑے عمل موثر سلاہ نا کاریم ئے کرینے ہموڑے گچین آ لٹریچر نا ہم خواست مسنے۔ زہنی جسمانی عیاشی تیٹ قوم ئنا خذمت مننگ کپک۔ دا ہیت ءِ پُہہ مروئی ءِ کہ دا جتا شخصیت و بےڈس انقلابی عمل تینا موثر کردار ئٹ ثابت کننگ ءُ۔
او پارے کہ منَہ موقع پرست آتے دا موقع تروئی اف کہ او تینا بے کاٹم آ سوج آتیٹ تینا انا نا خوش کننگ یا ردعمل نا وڑ بلوچ قومی تحریک نا برخلاف زہر تالان کیر ہرافتے پن کھٹنگ و شہرت نا شونق ءِ اوفتیا ہچو رکھ اف او پین پڑ ئس ہم گچین کننگ کیرہ۔ موقع پرست و سوشل میڈیا نا سادہ غا سنگت آتے اخر اَراتم اسکان پُہہ کروئی تمو، کہ انقلاب و جہد ارزان اف۔
ماما قدیر بلوچ پارے کہ اِرا پنت آ خوڑتی ئٹ غور کننگ نا پاوہ، الَو تو دا کہ ننا توانائی و وخت اسٹ ایلو نا برخلاف خڑچ مننگ نا جاگہ غا بلوچ قوم ئے صفحہ ہستی آن ڈھرفنگ نا جاگہ غا ریاست نا برخلاف کاریم ئٹ ہتنگ مرے، ایلو دا کہ سیوتی و اواری نا فضا امر ودی کننگ مرے۔ نغد کاری و کردار کشی ٹی فرخ ارے ہرا کہ منَہ سوشل میڈیا پرنٹ میڈیا ٹی نغد کاری و درستگی نا پن آ مننگ ءِ اودے گچین کننگ آخہ بلکہ خرابی و سیوتی نا جاگہ غا انتشار نا کنڈ آ دننگ ءِ۔
