کوئٹہ پریس کلب نا مونا زوراکی نا بیگواہی تا برخلاف وائس فار بلوچ مسنگ پرسنز نا برانزی کیمپ ئے اینو 5110 دے پورو مس۔ پنجگور آن سیاسی باسک علیم شنبے بلوچ، مجاہد بلوچ، اختر بلوچ و ایلو برسا خاؤت آتون اواری نا درشانی کریر۔
تنظیم نا سروک ماما قدیر بلوچ پارے کہ کوزہ گیر اسہ منصوبہ بندی ئسے نا رد ئٹ بلوچ آبادی تیا آپریشن بناء کرینے، ریاست پاکستان بلوچستان ئٹی تینا حکمت عملی تے بدل کرسا بلوچ نسل کشی ئے پین تیز کرینے داسا کوزہ گیر ریاست نہ بیرہ بلوچ آتے لس کھسفنگ بناء کرینے بلکہ تینا دا چم آتے جواز تننگ کن منصوبہ بندی نا رد ئٹ پروپیگنڈا ہم کننگ ءِ۔
او پارے کہ بلوچ نسل کشی ئے تیز کرسا جہد ئے نزور کننگ نا کوشست کننگ ءِ، تینا دا نسل کشی پالیسی تا لڑ ئے مونا درِسا درو تمپ آن اِرا ورنا ئے زوراکی ئٹ بیگواہ کننگا ہرافتیٹ روف ولد مراد محمد و پیر بخش بلوچ ئے پنجگور نا علاقہ آتیان بیگواہ کننگا و مستونگ، قلات، کوہلو، ڈیرہ بگٹی بلکہ بلوچستان نا ہچو جاگہ ئس اف ہراکان بندغ آتے زوراکی ئٹ بیگواہ کننگتنے۔ ورنا خاص کر خوانندہ آ ورنا تے زوراکی ئٹ بیگواہ کننگ نا لڑ ئے برجاء تخِسا سامراجی لشکر خضدار نا ہندی ورنا ئسے کوئٹہ آن بیگواہ کرسا بےڈس ءُ ہند ئسے آ درینے۔
ماما قدیر بلوچ پارے کہ پاکستانی لشکر بلوچ قومی جہد ئنا پن آن خلیس نا گواچی مسنے و بلوچستان ئٹی فرقہ واریت، مذہبی انتہاپسندی ئے مونا ہتنگ ءِ تاکہ بلوچ الس ئنا قومی جہد ءِ کاونٹر کننگ کن مذہبی انتہا پسندی نا برخلاف کاروائی نا بہانہ ئٹ بلوچ قومی تحریک ئے نزور کننگ مرے ولے جہان دا ہیت آن جوان پُہہ ءِ کہ مذہبی انتہا پسندی نا مونا ہتنگ سامراجی پاکستان و اونا ادارہ آتا کاریم ئسے۔
