ہرا وخت بندغی حق آتا لتاڑ مریک و مخلوق ئے لس کھسفنگ مریک گُڑا ریاست نا ایلو ادارہ غاک، پارلیمنٹ و عدلیہ تون اوار اَرا کنڈ آ سلوک ءُ؟ دا پاننگ ءِ اسلام آباد ئٹی بلوچ برانزی تا راہشونی ئے کروک ڈاکٹر ماہ رنگ بلوچ نا۔
ڈاکٹر ماہ رنگ بلوچ چاگڑدی حوالکاری ویب سائٹ آ لکھسہ پارے کہ ہمو بندغ آک ہرا پارہ کہ پاکستان ئٹی بندغی حق آتا لتاڑ بیرہ فوج کیک تو تیبہ ریاست ئے ذمہ وار پاننگپ۔ نن اوفتیان سوج کینہ کہ ہرا وخت فوج بندغی حق آتا لتاڑ ئے کیک و لس مخلوق ئے کھسفک تو ریاست نا ایلو ادارہ غاک، پارلیمنٹ و عدلیہ تون اوار اَرا کنڈ آ سلوک ءُ ؟
او پارے کہ بلوچستان ئٹی تدوکا 75 سال آن برجاء نسل کشی ٹی عدلیہ و پارلیمنٹ نا انت کڑد ئس مسنے ؟ ڈاکٹر ماہ پارے کہ دا کُل ئے الے، نن تدوکا اسہ تُو ئسے آن زوراکی نا بیگواہی و بیدس عدالت خون تا برخلاف مارچ کننگ اُن، تدوکا دہ دے آن نن اسلام آباد ئٹی تولوک اُن، ننتو پیر ءَ کماش، و چُنا ارے، ننے آ اسلام آباد ئٹی پیہنگائی تو بےدادی کننگا، دزگیر کننگا و چرجوئی ئٹ دڑکو و ہراسمنٹ تون مون تروئی تما۔ مگہ دا نیام ئٹ نُما پارلیمنٹ و عدلیہ دا کُل ئے توننگ ئٹ تینا کڑد ئے سر تس ؟
او پارے کہ ہرا وخت نُما عدلیہ، پارلیمنٹ تون اوار ریاست نا کُل ادارہ آک تینٹ دا لس خون، ظلم و جبر آ چُپ حمایتی مرور تو پُہہ مننگ ئٹی حق آٹُن کہ تیبہ ریاست ننا نسل کشی ٹی اوار ءِ۔
