زوراکی ئٹ بیگواہ آ راشد حسین نا ایڑ فریدہ بلوچ پارے کہ نادرست آ بندغ آتا نیمہ آن ننے کال کرِسا اسلام آباد ئٹی اڈ تِروک آ برانزی گِدان ئے ایسر کننگ کِن زور شاغِنگو ۔ او پارے کہ ننا سوج ہندادے کہ راشد حسین ارانگ ءِ ؟
فریدہ بلوچ اوسوز کرِسا پارے کہ نن شاریک تینا بیگواہ آ بندغ آتا داسہ سوج ئے کننگ کپّنہ ؟
او بیان ئٹی پارے کہ ننا خاوت ئے داکان مُست برانز کننگ نا سوب تڑی رسینگانے۔ اُراغا چھاپہ خلِسا باوہ تون اوار پین خلک والا تے لٹ ءَ کُٹ کرِسا بیگواہ کننگانے ۔ ننے اسلام آباد آ بننگ و داڑے روڈ آتا زی آ برانز کننگ نا شونق اف ولے نن انصاف نا خواست کینہ و ننے انصاف ایتِر۔
