بلوچستان نا ضلع کیچ ئنا بھلا شہر تربت ئٹی عدالتی حکم آن پد ہم بالاچ بلوچ نا قتل نا مقدمہ ئے نوشتہ وے کننگ آ برانزیک پولیس تھانہ نا مونا برانز کننگ ءُ۔
تربت شہر ئٹی ہشتمی دے ءِ کہ سی ٹی ڈی نا دروغ ئنا مقابلہ ٹی خلنگوکا ورنا بالاچ مولابخش نا خاؤت تون اوار ایلو بیگواہ آ بندغ آتا خاوت آک ،بندغی حق آتا تنظیم و خوانندہ آتا تنظیم آتون اوار سول سوسائٹی نا برانز برجاء ءِ۔
سی ٹی ڈی نا دروغ ئنا مقابلہ ٹی بیگواہ آ بندغ آتا خلنگ نا ایف آئی آر ئے نوشتہ وے کننگ نا برخلاف برانزیک پولیس تھانہ نا مونا برانز کننگ ءُ۔
برانزیک دروغ ئنا مقابلہ تیٹی زوراکی ئٹ بیگواہ مروکا ورنا تا خلنگ نا ایف آئی آر نوشتہ کننگ و ایلو خواست آتا حق ئٹی ہشتمی دے آ پولیس تھانہ نا مونا برانز کننگ ءُ۔
سی ٹی ڈی نا دو آن خلنگوکا ورنا بالاچ مولابخش نا تدفین ئے درو ہزار آتا کچ ئٹ بندغ آتا ساڑی مننگ تون کریر۔
برانزی تا پاننگ ءِ کہ خواست آتا پورو مننگ اسکان ننا برانز برجاء مرو۔
یاتی مرے کہ تربت نا سیشن کورٹ سی ٹی ڈی نا برخلاف ایف آئی آر نوشتہ کننگ نا حکم تس ئس ولے پولیس مقدمہ ئے نوشتہ کتو ایلو نیمہ آ اینو بلوچستان حکومت سیشن کورٹ نا سی ٹی ڈی نا برخلاف ایف آئی آر نوشتہ کننگ نا حکم ئے بلوچستان ہائی کورٹ ئٹی چیلنج کرے۔
