چار شمبے نا دے آ اسرائیلی ڈیفنس فورس پارے کہ تدوکا 24 گھنٹہ ٹی دہ لشکری کارندہ بیران مسُنے ۔
یاتی مرے کہ اکتوبر نا آن پد اسرائیل نا کُل آن بھلا نسخان ہندا مسُنے ۔
اندون دا موقع ئٹ نیتن یاہو ریڈیو ٹی لشکری کارندہ تیتون ہیت کرسا پارے کہ نن سُہبمند مننگ اسکان، حماس نا ختم کننگ اسکان تینا جنگ ئے برجاء کرون ۔
اسرائیلی وزیر اعظم پارے نے ای دا ہیت ئے بھاز تکلیف ئٹ بلکہ جہانی ہڑاند آتے مون ترسا پاوہ کہ ننے ہچ کس سلِفنگ کپک ۔
اسرائیل نا وزیر خارجہ ایلی کوہن چار شمبے نا دے آ پارے کہ اُونا ملک ، حماس نا برخلاف جنگ ئے جہانی مُختفی تون یا اوڑان بیدس برجاء تخو ۔
او پارینے کہ برجاء انگا جنگ بندی دہشت گرد تنظیم حماس کن اسہ سوغات ئس مرو و دادے واپس ہرفنگ آن اوفتے اسرائیل نا بندغ آتے تڑی تننگ نا موقع رسینگءُ ۔
اسرائیلی وزیر اعظم پارے کہ لشکری نسخان مرے یا جہانی کُمک ئٹی کمی ، انت گِڑاس ، حماس نا برخلاف آ اوفتا جنگ آ اثر تخپرو ۔ اسہ جائزہ سینا رد ئٹ فلسطین ئٹی حماس نا مُختفی ٹی گیشی بسُنے ۔
