لُمہ! بنی آدم تینا زند ئنا سفر ئے کہ بناء کیک، گُڑا چاگڑد اودے بھاز آ چکاس آتیٹ بِٹک۔ اندا چکاس آتیان گدرینگِسہ بندغ تینا بالاد ئے بھلن کیک۔ لُمہ، ننا گچاری نا بنگپ ہیرجان ءِ۔۔۔ ہیرجان انتئے؟ ہیرجان اَرا کڑد ءِ کہ ننا بن گپ نا سرحال مرے۔ ولے ایہُن کہ ہمو وختا کہ ای سار کریٹ، تانکہ ورنائی نا سیم آ سر مننگ اسکان ہرا زالبول کن کہ جہان نا زیبا غا، پارسا و اٹکل تخوکا اس، اونا پِن تینٹ شّرنگ اس۔
وختس سیاسی مُج و دنز کہ تولِسہ کرے، ای و واجو کہ اِرا جتاؤ کسر نا مسافر ئسون، داسا ننا کسر اسٹ مس و سدھا غا کسر آ پند خلنگ ئسون۔ سیاجی اس، ای اسُٹ، واجو اس۔
ننا کُل ہمراک بیدس کنے آن پین کڑد ئسے تون ڈک کُنگ۔ اونا پِن مہناز اس۔ ای شرجان نا کڑد ئے ارفیٹ و اود مہناز نا۔ نن ہرا وخت کہ یکہ مسُنہ گُڑا دا اِرا شیرزال ننا بُن گپ مسُرہ۔ وختس کبینو چکاس کہ بسُر، گُڑا دا تومکا شیر زالک تینا گچین آ نیاڑی گری آ کڑد ئے اندا وڑ سوگو توریر کہ ننا پاروکا ہیت آک نزور تمار۔ ہچو شک ئس اف کہ شرجان و مہناز تون اوار بلوچ نا ہر لمّہ اندا کڑد ئے تینا زند ئنا بشخ جوڑ کرینے ۔۔۔۔
داسا بر کہ لمّہ نا کسہ غا تے کینہ
ایہُن لمّہ ۔۔۔۔ لوز ئے معنی کننگ ہم اڑزان اف۔
اندن بلوچ چاگڑد ئٹی نن خننہ کہ وختس لمّہ مار ئس ودی کیک گڑا خلق ئنا کُل نیاڑیک چانڑدہ نن اسکان اوڑا بریرہ، اونا سفت و ستا ئے کیرہ۔ دا سفت آتیٹی لمّہ نا سفت تینا بے مٹ آ مار کن دُن مریک:
لیلو لیلو منی بچی من ترا نازیناں
(لیلو لیلو کنا مار ای نے نازیفیوہ)
تو مزن بئے وتی راج ءَ وتی بڈا بندئے
(نی بھلن مروس تینا راج ئے تینا بڈا تفوس)
بلوچ چاگڑد نا راستی انداد ءِ کہ بلوچ نا لمّہ غاک اندا سفت آتا پد آ تینا مار تا کڑد ئے گوْفینو۔ بلوچ نا دیہاڑ لمّہ غا تیان بیدس پورو اف۔ لمّہ غاک اریر، تو مار تا کڑد چاننگ مریک۔ پانزدہمی کرن ئٹی کہ نن بلوچ دیہاڑ ئٹی کمبر نا لمّہ نا کڑد ئے خنِنہ، گُڑا ای سرپند مریوہ کہ بلوچ چاگڑد ئٹی مزاحمت ئے بناء ہم لمّہ غاک کرینو؛
آ مرد کہ میاراں جل انت
نیمروچاں نہ وپساں کلاں
(اے نرینہ غاک کہ میار جل ءُ، خاچپسہ نیمروچ اسکان)
اندا مزاحمتی کڑد بلوچ چاگڑد نا ہر لمّہ ئے انسپائر (inspire) کیک و ہر لمّہ فخر ئٹ تینا مار کن اندا کسہ ئے کرسا و ودی کیک۔
پانزدہمی کرن آن ہلیس تا اینو بیست و یکمی کرن آ بر لمّہ نا کڑد گیشتر ڈولدار و زیبا ءِ، اینو بلوچ نا جنگ ئنا خواست و دوئی کننگ بلوچ نا ڈغار ءِ ۔۔۔۔۔ اگہ ای رد افٹ تو بلوچ زمین ئے لمّہ تون تشبیہ ایتک۔۔ دا زمین نا مہر کن ای لمّہ غا تا کڑد ئے لوز آتیٹ پاننگ کپرہ، انتئے کہ کڑد ظاہری دروشم آ بھاز پاک و ڈولدار مریک۔ تینا اسل انگا دروشم و چاگڑد ئے موٹیویشن ایتک و لوزاک اندا کڑد آتے مصنوعی دروشم آ درشان کیرہ و نشان ایترہ۔ اندا سوب آن دا ہیت ئے ای مالو آن مونا تخنگ خواہوہ کہ ای تینا لوز آتیٹی لمّہ غا تا پاک و ڈولدار آ کڑد ئے ڈولدار کننگ کپرہ۔
ولے کنا زرد ءُ جبین نا مُر انگا مارشت ہر نن خاچنگ آن مُست کنے آن سوج کیک کہ نا رہا لمّہ انتسے؟ انتئے لمّہ و چُنا نا سیالی بھاز ہتلی ءِ؟ اندا مارشت کنے لکھنگ کن بیوس کیک کہ لِکھ، انت لکھیسہ؟ امر لکھیسہ، اَرا لمّہ کن لکھیسہ؟ ولے لِکھہ۔۔۔۔ جہد انداد ءِ کہ ای تینا زند ئٹی خنوکا لمّہ غا تا کڑد آتے تینا لوز آتیٹ نوشتہ کیو۔
اندا پاس آ کنا خیال کنے راہشون آ واجہ غلام محمد نا ترانگ و شئیر آتا کنڈ آ دیک۔ واجہ تینا لمّہ ئے شئیر آتیٹی سرپند کیک و پائک:
ماتی منی مات مکہیں
پنتے چہ آ ماتاں بزور
لجانی دیمپان اش کت انت
بچ تنگوئیں شیرو مزار
دا دیہاڑ ءِ کہ وختس چُنا ئے لمّہ نا، و وختس لمّہ ئے چُنا نا کڑد آتیٹی نشان ایتک۔
تینا مڷ ئے قربان کننگ نا جوزہ انت ئس ءِ۔۔۔ وختس کنا سنگت کنا ہمراہ شہید خالد نا لمّہ نا کلوہ بلوچ راج کن سر مس اندن پار بلوچ چاگڑد نا اوشتانک ئٹی ساہ تما۔ ہمو شیر زال کہ نی ساندہ بی بی ماس پاریسوس، اونا ہیت آک اسر کہ بیرہ خالد نہ، کُل بلوچ شہید آک ہرا کہ گلزمین آ ندر مریرہ کنا چُناک ءُ۔ بلوچ لمّہ غا تا صبر جیرت سانبھیک۔۔۔ لُمہ، نی خنانُس و سرپند اُس کہ حیات نا جون آ اونا لمّہ نا دوک بُڑز ءُ۔ ای اندا پُہہ مریوہ کہ حیات نا لمّہ خُدا ئے توار کننگ الو، او کنے و نے توار کننگ اس۔ بلوچ راج ئے توار کننگ اس۔ اندا وڑ ای بھاز آ گڑا تے تینا وڑ آ معنی کیوہ۔ مننگ کیک ای رد مریو ولے کنا چاننگ و علم کنے اندا وڑ محسوس کننگ کن پائک۔ بالی نا ہیر جان نا صبر ہم اندنو کسہ ئس ءِ۔
ایہُن لمّہ کنا داسان نا نیتو کچاری نا بُن گپ بالی و ہیر جان ءُ ۔۔۔۔ ہیرجان ایہُن تو لس نیاڑی ئس ءِ ہرا زند ئنا بھاز آ سختی تیان گدرینگِسہ زند ئنا پند ئے خلنگ ءِ۔ بالی ئے ای ہر وختا پُپّی (تاتہ) نا چُنا پاریٹہ۔ اندن کہ سیالی ٹی ہیرجان و ای سیالی نا اندا بشخ آ تمِنہ۔ گُڑا اسہ دے بالی جان کنے پارے کہ ہیرجان بھاز اُستا کرینے کہ نی کنے پُپّی پاسہ، ای و نی ہم سَن اُن۔۔۔ دا ہیت آن پد ای بالی جان ئے اُسل پُپّی نا چُنا پاتوٹ۔ داسا کنا با ٹی اونا پن ساندہ بالدوست و بال جان اس ۔۔
ایہُن ہم بالی ہرکس ئے دوست اس۔ بالی و پیرک یار اسر۔ ہڑتوما تا کڑد ئنا ہر جاگہ غا ہیت مسکہ۔ جنگ و سیاست تون اوار ہر مجلس ئٹی بالی ئے ہیر جان نا غم تُد اس۔ مدام مخِسہ پاریکہ “خنِسہ بالی ئے گڑاس مس، ہیر جان کہو۔ او مالو آن بلڈ پریشرو شوگر نا مریض ئسے۔ دا ڈکھ ئے امر سگنگ کرو۔۔۔ ہیر جان سیاست و نظریہ آن باز مُر ءِ، پِنو بزَگ مرو کہو۔
ولے لُمہ جان، ہیر جان زندہ ءِ، فخر کیک کہ ای بالی جان نا لمّہ اُٹ۔ لُمہ، نے ہیت ئس پاننگ خواہِوہ۔ ای بالی و پیرک جان اسہ گڑاس خناٹ۔ ہڑتوما تینا راجی مسخت کن سخت شیدائی اسر۔
بالی ساندہ وختس کہ کنتو مجلس کریکہ، اونا بُن گپ جنگ اس، سیاست اس۔ ای خواہسُٹہ کہ بالی کنے مشغول کے مخفِہ۔ ولے بالی ئس کہ اونا ارواہ ٹی خاخر ئس لگوک اس، اونا کچاری تا سرحال جنگ، سیاست، جنگی رپک و ہنر۔۔۔ دا امر مروئی ءِ امر کروئی ءِ۔۔۔ اسہ حساب ئٹ او کنے جنگ خوانفنگ اس۔ ای ہراڑے کہ کیمپ کریٹہ گڑا بالی اسہ وار کنے آ المی سر کریکہ تینے۔ ساندہ کوشست تہ اندا اس کہ پوسکنو ہنر و رپک جنگ ئٹی ہتنگ مرے۔ او کنے بھلو جنگول ئس سرپند مسکہ۔ اگہ اندن ءِ گُڑا و رد مسنے۔ ای تینٹ پند خلوکا ورنا تیان باز گڑا ہیل کرینٹ۔ اسل آ چُنکا سنگت آک ہر وختا ننے آن ہیل کننگ نا خواستگار مریرہ۔۔۔ ولے راستی دادے کہ نن تینا گونڈل و ہمراہ تیان ہیل کینہ۔ دادے بیرہ نن پُہہ مننگ کینہ پین کس نہ۔
لُمہ۔۔۔۔ نے آن پد بلوچ نا مار و مسنک جنگ ئٹی پوسکنو پرآشوب ءُ رنگ ئس شاغار۔ نا رندگیری ٹی اینو شارل نا رنگ ئٹ ندر مننگ ءُ و ہمراہ ءُ۔ ولے دا سرحال آ ای نیتو پین وختس ہیت کروٹ۔۔۔۔۔۔۔
لُمہ ۔۔۔۔ بالی و ہیر جان ئے نی خُڑک آن خنانُس کہ اختس مہروان اسر۔ اندن کہ نی و لمّہ جمیلہ اسُرے۔۔۔ کنے ناظر پائک کہ ساندہ ہیر جان و جمیلہ کچاری اسر، گُڑا ہڑتوما تا کچاری نا گیشتری بشخ تینا چُنا تا کڑد ئنا ستا کننگ اس۔۔۔۔ لمّہ جمیلہ تینا شاعری ٹی لُمہ نا ستاہ ئے کرینے و ہیر جان پُھلی پُھلی تون بالی نا ستا ئے کرینے۔۔۔۔ ولے لمّہ اینو نی و بالی تینا لمّہ غا تیکن فخر و شان ئٹ تینا پن ئے دیہاڑ ئٹ لکھفیرے۔۔۔۔
اینو نُما کڑد و عمل چاگڑد ئے مٹ کرینے۔ دیوان و مجلس تا سرحالک بدل مسنو۔ منَہ وخت مُست تربت ئٹی عطا شاد نا یات ئٹ بلوچستان نا پروفیسر، ڈاکٹر، ادیب و شاعرک اسہ مُچی ئس اڈ تسوسر۔ اوڑے ای گیشتر شاعر و ادیب آتا ہیت آتیٹ ہیر جان و جمیلہ ئے خناٹ، اندن پار کہ بلوچ لمّہ غا تے خناٹ۔۔۔۔۔۔
