خَنتا روشنائی راشد جان!
نا سلامتی و آجوئی کن نن زند ئنا ہر پاس دعا کینہ دے چائہ ننا دعاک اللہ نا در آ اَرا وخت سر مرور نی سلامتی ئٹ بروس ۔۔۔۔۔۔۔؟
بھلو وخت ئسے آن پد اُست اومان کرے کہ نا پنا چِٹّی نا دروشم ئٹ چھار لوز نوشتہ کیو ، ولے نا یات آک بھاز ءُ نا زہیراک کنے ہندُن بے آرام کرینو ای حیران اُٹ تپرہ کہ تینا چِٹی ئے اَراکان بناء کیو۔
راشد جان !
دسمبر نا تو ءِ نن تینا ہنکین آن بھاز مُر و درآمد او ہند ئسے ٹی اُن ای ءُ کنا لمّہ پین منہ زوراکی ئٹ بیگواہ آ بندغ آتا خاہوت آتون اوار اسلام آباد پریس کلب نا مونا یخ ئٹی توسونُن۔ نن تینا زندگی ٹی دُن تِتّنون کہ دا زمین نا زی آ نن تینا قدم تے تخون ، ولے نا یات آتا کُبین آ دڑد ئے کہ ننے داڑے سر کرینے۔
اسلام آباد بھاز زیبا و آسرات او شار ئسے ، اراڑے ہندی بندغ آتے زند ئنا کُل آسراتی تننگانے ۔ ہَرافتا چُناک جوان او اسکول آتا ہِننگ آ خننگِرہ۔
ارٹمی نیمہ غا بلوچستان نا گیس اسلام آباد نا اُرا اُرا تیٹی سر مننگ ءِ ، ولے نن کِریٹ و بارُنو پاٹ ہُشِسہ تینے باسِفنہ و تینا وخت ئے دِھکّہ ایتِنہ ۔
داڑے نن کُل زوراکی ئٹ بیگواہ آ بندغ آتا خاہوت آک تینا دوست اِنگا تا خیال ئٹی اُن کہ داڑے ننے بیننگ کہ خیری و کوٹ ارے ، بارُن و تہارا کوٹی تا تہٹی نُما حال انت ءِ۔۔۔۔۔۔؟ نن اِرغ کُننگ نا وختا نُمے یاد کینہ گُڑا دا کُننگ ننکن زَہر جوڑ مریک ۔ کُل بندغ آتا کاریم بس خڑینک شولنگ ءِ۔تینتون ہوغنہ و تینے اُست تینہ۔
راشد جان !
زوراکی ئٹ بیگواہ آ بندغ آتا خاہوت آتا زندگی بھاز جنجال ءِ باور کر ۔نن تینا دا رنج آتون دے ئس ہند ئسے آ در پہ در اُن ۔ بندغ آک ننا ہیت آتا بِننگ آن بیدس ننا زی آ مسخرہ کیرہ ۔ داڑے عدالت و سرکار نا کاریم ہندادے کہ بیگواہ آ بندغ آتا خاہوت آتا توار ئے بند کننگ ، و جہانی کمیشن جوڑ کَننگ ءِ ۔ ولے کارکردگی ہچ اف ۔ دا ریاست نا کُل ادارہ تا نیمہ غان ننے آ دوبہ خلنگ مریک کہ نُما بندغ آک مش تیٹی جنگ آٹو نم ریاست ئے بدنام کیرے و برانز کیرے۔
دا پِن ئنا کمیشن زور ئٹ بیگواہ آ بندغ آتا پنا جوڑ کننگ آ وخت ئس زوراکی ئٹ بیگواہ آ بندغ آتا خاوت آک تینا عزیز آتا کیس تا یاداشت کننگ کہ کارہ گُڑا اوفتون ترنُد او وڑ ئسے ئٹ پیش مریرہ کہ دا بندغ آک تینا عزیز آتا کیس تا یاداشت کننگ کِن پدا بفس و است آن دیر تا، بلکہ تینا جہد ئنا برجاء توننگ ئے یلہ کیر ۔
عدالت نا پِن ئنا (ایلوفتا منشاء ئٹ کاریم کروک ) آ کمیشن تا جنجال آن بیدس ہمو زوراکی ئٹ بیگواہ آ بندغ آتا خاہوت آک تینا دوست اِنگا بندغ آتا آجوئی کن توار بڑز کننگ کہ جتا او وڑ ئٹ خُلیفنگ مریرہ۔ نادرست آ نمبر آتان فون کننگ و تڑی تِننگِک، وخت ئس مون ڈھکوک بندغ آتا نیمہ غان کاغد بٹننگ مریک و کاغد آتا زی آ نوشتہ کروک ءِ ” بے توار مبو ۔۔۔۔۔۔ اگہ نہ تو نُما خیر مروف ۔۔۔۔۔۔
نن داسہ دا کم ظرف آتا نیمہ غان دہن آ زوراکی تا چال و آزار کننگ ئے ھیل کرینُن ، ولے داسہ زوراک ننے خلیس و تڑی تِس یا چال بازی تیان رَد تننگ کپک ۔ ننا آخری خواست نا سر سلامتی ئٹ آجوئی ءِ داڑان بیدس نن پین ہچ خواہِپنہ ۔ نن تینا جہد ئے ہمو وخت اسکان برجاء تخون ہَرا وخت اسکان کہ نی آجو مفیس ۔ ننے ہَرا وڑ او ہم جنجال مونا برے نن نا آجوئی کن مُستی ہِنون و چَک ءُ پد مروفن۔
