ریڈیو زْرمبش براہوئی | ریڈیو زْرمبش براہوئی,Baloch-missing-persons-

عدالتی حکم آ داسکان عمل متنے، سی ٹی ڈی افسر و ایس ایچ معطل افس

عدالتی حکم آ داسکان عمل متنے، سی ٹی ڈی افسر و ایس ایچ معطل افس

DEC

17

بلوچستان نا ضلع کیچ ئنا بنجائی شار تربت ئٹی بالاچ مولا بخش نا خون ئنا کیس ئٹی پن کروک ڈوہدار سی ٹی ڈی افسر آک و ایس اویچ او نا معطلی نا عدالتی فیصلہ غان پد ہم داسکان عمل متنے۔


بلوچستان ہائی کورٹ بالاچ مولا بخش ئے دزگیری ٹی خون کننگ ئٹی تُد پاکستان نا پولیس نا ادارہ سی ٹی ڈی نا چھار کارندہ ہرافتیٹ آر او ہم اوار ءِ نا برخلاف کارروائی کرسا اوفتے عغدہ آتیان معطل کننگ نا حکم تسس۔


دا عدالتی حکم نامہ غا پولیس ڈیپارٹمنٹ یا بلوچستان حکومت نا کنڈ آن زرس کاروائی ہم کننگ متنے۔


 


پولیس نا اسہ ذمہ وار واکدار ئسے نا رد ئٹ پولیس تھانہ تربت نا ایس ایچ او ہرادے ہمو چھار سی ٹی ڈی کارندہ غا تا برخلاف ایف آئی آر وے کننگ آ معطل کننگاسس، اودے بیرہ عہدہ غان مُر کننگانے ولے او داسکان پولیس تھانہ ٹی کاریم کننگ ءِ۔


پن کروک ذمہ وار پولیس آفیسر نا رد ئٹ عدالت نا حکم آ دا حد اسکان عمل کننگا کہ سی ٹی ڈی نا آر او ئے ٹرانسفر کننگا و دا گھام ئے ہم اونا رکھ کن ہرفنگانے تاکہ تربت ئٹی اونا وے ساڑے مننگ آ اونا پن برانز آتیٹ ہلنگ مف۔


حوال تروکا نا رد ئٹ عبداللہ پن آ سی سی ٹی ڈی کیچ نا آر او اسہ ڈھکوک ادارہ ئسے نا بڑزکو افسر ئسے اودے دزگیر کننگوک بندی تا دزگیری ٹی خون کن تربت آ رادہ کننگاسس۔ حوال تروک دعوی کرینے کہ سی ٹی ڈی افسر تینا دا پوزیشن آن پین دیمروی نا خُڑک ءِ۔


 


حوال تروکا نا رد ئٹ بروکا اسہ اِرا تُو ئٹی اونا مننگ کروک ترقی نا پیش نظر خفیہ ادارہ غاک براہ راست ونا مُخ تفی ئے کننگ ءُ۔ وختس کہ مسکوہی ایس ایچ او السی برانز و سیشن کورٹ تربت نا حکم آ آر او نا برخلاف بالاچ نا خون ئنا کیس درج کننگ نا کوشست کرے تو اودے براہ راست آئی جی پولیس بلوچستان آن فون کننگا و سخت چھڑنگ آن پد دنو گھام ہرفنگ آن تینے پد توننگ نا پنت تننگا ہرا نا سوب آن تینٹ ایس ایچ او ئے عدالت نا حکم آن چپ ہننگ نا سوب آن معطل کننگا واہم اونا معطلی بیرہ پن ئکن ءِ۔