بلوچ زنک ایسری نا برخلاف بلوچ یکجہتی کمیٹی نا کنڈ آن اڈ تروک بیگواہ غا بندغا تا خاؤت آتا لانگ مارچ اینو ہفتہ نا دے خضدار آ سر مس۔
خضدار ئٹی کیہی بندغاک لانگ مارچ ئے بخیرٹ کریر و برانز ئٹ اوار مسر۔ آزادی چوک آ برانز کرسا خاؤت آک تینا بندغا تا آجوئی نا خواست کریر۔ دا وختا خضدار آن بیگواہ مروک بندغا تا رجسٹریشن ہم کریر۔
لانگ مارچ اینو نال آک پیشتمِسہ وختس خضدار شار بننگ اس تو اودے فیروز آباد نا ہند آ توننگ نا کوشست کننگا۔ بست و بند کسر آ کنیٹر تخسہ کسر تے بند کننگ نا کوشست کرے ولے مارچ ئنا بندغاک غٹ ہڑاند آتے سر کرسا خضدار شار ئٹ سر مسر۔
یاتی مرے کہ تربت آن پیشتموکا لانگ مارچ کن ہیرونک، تجابان، پنجگور، بسیمہ، ناگ، گریشہ، نال آن پد خضدار ئٹی بھاز گچینو بخیرٹی مچی اڈ تننگا۔
شام ئنا مارچ ئنا بندغاک خضدار ئٹی مرور و پھگہ قلات نا کنڈ آ رادہ مرور۔ دا وختا برانز ئٹی اوار مروکا بندغاک پاریر کہ بندغاک بیم و خُلیس آن پیشتمسہ تینا بندغا تا وارثی ئے کیر۔ او پاریر کہ ننے تینا شہید و بیگواہ مروکا تیا ناز ءِ، ننے سیوتی ئٹ جہد برجاء تخوئی ءِ۔
