اواری نا درشانی کروکا تیٹ بارکھان آن سیاسی و چاگڑدی باسک ذوالفقار بلوچ، ابوبکر بلوچ و ایلو اوار ئسر۔
وی بی ایم پی نا وائس چیئرمین ماما قدیر بلوچ پارے کہ اینو اسکان ریاست پاکستان ہر ہمو چم ءِ کاریم ئٹ ہتنگ ءِ ہرا کہ اسہ کوزہ گیر اس ہر وخت پد تموک قوم آتیا و کوزہ مروک علاقہ آتیا کارمرز کیک۔ بلوچ قوم آ بےدادی اودے اونا ایمنی ئٹ کروکا جہد آن دو کشفنگ نا کوشست ئسے۔ اینو ریاست خڷ ءَ بِٹ نا پالیسی ءِ بلوچ سرزمین نا غلامی ءِ سوگو کننگ کن کاریم ئٹ ہتنگ ءِ و دا ٹی ہڑدے جتا وڑ ئٹ ترندی ہتنگ ءِ۔ پاکستان تینا چارمی ستون ءِ میڈیا ءِ کنٹرولڈ جمہوریت نا وڑ آ اسہ کنٹرولڈ میڈیا اس تخیسہ بلوچستان ئٹ تینا زوراکی تے ڈھکنگ و جہان ءِ گمراہ کننگ کن بلوچستان ئٹ ایمنی نا رٹہ خلنگ ءِ اگہ کس ءِ اونا ضمیر توننگ کتو تو اونا حشر بلوچستان نا صحافی تا ڈول مرو۔
ماماقدیر بلوچ پارے کہ بلوچ آتیا بےدادی و زوراکی، سائل آتا لُٹ ءَ پُل تون اوار بلوچ دھرتی ءِ تینا ایٹمی سلاء تا چکاس آن زہرآلود کریسہ اینو سرطان کون آ ناجوڑی نا سوب جوڑ مسنے۔ داڑے حق ئنا ہیت ءِ کروکا تے ریاستی تاغت آک زوراکی ئٹ بیگواہ کریسہ و بےدادی نا گواچی کریسہ ہزار آ جون تے ننے تسنو۔ ہزار آ ٹارگٹ کلنگ نا گواچی مسنو، ارٹمی جنگ عظیم آن گڈ بندغ آتا ساہ تے ضائع و جہان نا امن ءِ نظر ئٹ تخیسہ اقوام متحدہ نا پن ئٹ اسہ جہانی ادارہ اد اڈ تننگا تاکہ تیوہ جہان ءِ اسہ تلہ سے آ اوار کریسہ بندغی اقدار نا ودیک لتاڑ ءِ توننگ مرے۔ ولے نن بلوچ آتا توار تینا جند ئنا کوچہ آتیٹ گُم مریک انتئے کہ بھلو وخت ئسے آن برجاء بندغی حق آتا لتاڑ آ ہچو خوندی ءُ ردعمل مونا بتنے، حالانکہ بلوچ تینا جتا وڑ ءَ ڈول ئٹ تینا سرزمین آ بندغی حق آتا لتاڑ ءِ جہان نا مونا پاش کننگ نا کوشست کرینے۔ ہراٹی رانز مچی، دپ درشانی، ہڑتال، جہانی اسارہ آتا پن آ چٹی لکھنگ تون اوار تاریخ نا سہ مُرغن ءُ لانگ مارچ، و بین برانز کیمپ اوار ءُ۔
