ہنوکا دےتیٹ زوراکی ئٹ بیگواہی تہ برخلاف لانگ مارچ نا وخت آ دزگیر مروکا 160 ئنا خُڑک خوانندہ آک استو شام آجو مسُر ، واہم ڈاکٹر ظہیر تون اوار 100 آن زیات خوانندہ آک دائسکان بیگواہ ءُ۔
بلوچ یکجہتی کمیٹی نا رد ئٹ اسہ بھلو جُہد ئسیان پد 160 آن زیات بلوچ برانزی تے آجو کریر ۔ او پاریر کہ اسلام آباد پولیس نا درشان غلط و غیر منطقیءُ۔ داڑان بیدس 100 آن زیات خوانندہ آک پولیس نا دزگیری ٹی ءُ و اوفتے آن منٹ ئس بیگواہ ءُ ۔
او پاریر کہ اسلام آباد پولیس ننے و میڈیائے پک ءُ حوال تننگ اف۔ ڈاکٹر ظہیر بلوچ بیگواہ ئے ، ننے اوفتا زند ئنا فکر ءِ ۔
یاتی مرے کہ ہنوکا دے تیٹ اسلام آباد آ پیہنگ نا کوشست ئٹی پولیس لانگ مارچ نا برانزی تے تورسا تشدد کرے ہراٹی بھاز برانزیک ہرافتیٹ چُنا اوار اسُر ٹپی مسُر پدا پولیس سد آ تا کچ ئٹ لانگ مارچ نا برانزی تے دزگیر کرے ۔
اسلام آباد ئٹی بلوچ برانزی تہ تشدد و دزگیری آن پد پاکستانی حکومت آ جہان تنقید کننگ ءِ ناروے و یورپی یونین نا سفیر پاکستان پولیس نا کاریم تہ پریشانی نا اظہار کرے ۔
یورپی ڈیہہ آتا نیمہ آن پاکستام آ زور تننگ ءُ کہ بلوچ برانزی تہ برخلاف طاقت نا کارمرزئے بند کیر و دزگیر مروکا برانزی تے زوت آن زوت مونا ہتیر۔
ایلو نیمہ آ اسلام آباد لانگ مارچ برانزی تے آ تشدد و دزگیری تہ برخلاف تیوعہ بلوچستان ئٹ برانز آک برجا ءُ ۔
