پاکستان نا بنجائی شار اسلام آباد ئٹی اینو نُہمیکو دے ہم زوراکی ئٹ بیگواہ مروک بلوچ آتا خاؤت آتا برانزی کیمپ برجاء مس۔
خاؤت آک نیشنل پریس کلب اسلام آباد نا مونا تینا علامتی بھوک ہڑتالی کیمپ ئے برجاء تخار، ہراٹی متحدہ عرب امارات و پدان پاکستان آن زوراکی ئٹ بیگواہ کننگوک راشد حسین بلوچ، زوراکی ئٹ بیگواہ کننگوک جہانزیب محمد حسنی نا لمّہ، بیگواہ آصف و رشید بلوچ نا ایڑ سائرہ بلوچ و مستونگ آن بیگواہ کننگوک پولیس ئٹ کاریم کروک سعید احمد نا لمّہ، سجاد و ظہور احمد نا خاؤت آک اوار ءُ۔
اسلام آباد برونزی کیمپ ئٹ اوار خاؤت آتا خواست ءِ کہ راشد حسین تون اوار ایلو کُل بیگواہ مروک بندغا تے زوت آجو کردا، جہنای بندغی حق آتا ادارہ آتا ساڑی گری ٹی بلوچستان ئٹی زوراکی نا بیگواہی، دروغ ئنا مونتس و بندغی حق آتا لتاڑ نا ایسری، بندغی حق آتا تنظیم آک بلوچستان ئٹی مروکا مُست ئنا و دا زوت ئٹ مروک زوراکی نا بیگواہی نا کیس آتیا غیرجانبدارانہ پٹ و پول کننگ مرے۔
اوفتا پاننگ ءِ کہ دا بیرہ منَہ بندغ یا خاؤت آتا آخہ بلکہ تیبہ بلوچستان نا ویل ءِ ہخس کہ زوراکی ئٹ بیگواہ مروک بندغا تا خاؤت آک داڑے اریر او کُل ئنا نمائندگی ئے کیرہ۔ او پاریر کہ ننا خواست آتا پورو مننگ اسکان ننا برانز برجاء مرو۔
