اسلام آباد ئٹی درو نگران بنجائی وزیر داخلہ سرفراز بگٹی تون بیگواہ غا بلوچ آتا خاؤت آک ملاقات کریر۔ ملاقات ئٹی بیگواہ مروکا بندغ آتا وکیل و بندغی حق آتا باسک ایمان زینب مزاری ہم اوار اس۔
حوال تا رد ئٹ وزارت داخلہ نا سیکرٹریٹ ئٹی مروکا ملاقات ئٹی سرفراز بگٹی نا کنڈ آن بیگواہ مروکا بندغ آتا خاؤت آتے اِرغ نا دعوت نا صلاح خلنگا ہراڑا او پاکستانی وزیر داخلہ سرفراز بگٹی نا دعوت نا صلاح آن نمن کریر۔ او پاریر کہ ننے دعوت آخہ بلکن ننا بندغ آک بکار ءُ۔
اوفتا پاننگ اس کہ سرفراز بگٹی پارینے کہ زوراکی نا بیگواہی تا بارو ئٹ اسہ ہفتہ ٹی کُل ایجنسیک تینا رپوٹ آتے ایتور و اَرا حیات ءُ، اوفتے پاش کننگو و اگہ کس ئس زندہ اف تو اوفتا خاؤت آتے پاننگو۔
خاؤت آتا پاننگ ءِ کہ سرفرازبگٹی نا ہیت آتیان ہندن گمان مریک کہ او بیگواہ کننگوکا بندغ آتا آجو مننگ آ سوبر اف ہرا وڑ بلوچستان ئٹی جنگ ئنا حوالہ ترسا بیگواہ مروکا بندغ آتا ویل ئے پد بٹنگک۔
