زوراکی نا بیگواہی تیان زیمی مروک آتا جہانی دے آ خضدار شار ئٹی آصف و رشید نا خاہوت نا کنڈ آن اسہ برانز اس اڈ تننگا اندن شہید رزاق چوک آن آزادی چوک اسکان پیادہ مارچ ہم کننگا۔
برانز ئٹی بیگواہ آ بندغ آتا خاہوت آتیان سعداللہ بلوچ نا باوہ، کبیر بلوچ، مشتاق بلوچ، و عطاء اللہ نا خاہوت آن کبیر نا لُمہ ہم ساڑی ئس۔
برانز ئٹی تینا خیال آتا درشانی کروک آتیٹی آصف و رشید نا ایڑ سائرہ بلوچ، شفیق الرحمن ساسولی، ڈاکٹر حضور بخش زہری، صابر حسین قلندرانی، علی احمد شاہوانی، بیگواہ کبیر بلوچ نا لمہ اوار ئسر۔
برانز کروکا تتون تران کریسہ کبیر بلوچ نا لمّہ نا پاننگ ئس کہ کنا مار کبیر بلوچ چانڑدہ سال آن بیگواہ ءِ۔ اونا پاننگ ئس کہ ای ناجوڑ ئسے اُٹ ای نئے کوئٹہ آ ہِننگ کیوہ نہ کراچی آ نئے اسلام آباد آ۔
اونا پاننگ ئس کہ کنا چُنا کبیر بلوچ مشتاق بلوچ و عطاء اللہ تون اوار غٹ بیگواہ آ بندغ آتے آجو کننگ مرے اخیر اوفتا گناہ و ڈوہداری انت ءِ کہ اوفتا سزا داسکان ایسر مفک۔
اندن آصف و رشید نا ایڑ سائرہ بلوچ تران کریسہ تینا ایلم تا آجوئی نا خواست کرے۔ اونا پاننگ ئس کہ کنا ایلمک چار سال آن بیگواہ ءُ و دا چار سال ئٹی نن ارا اذیت آتیان گدرینگانن ای دا اذیت ءِ لوز آتیٹ بیان کننگ ہم کپرہ۔
اونا پاننگ ئس کہ ای خضدار نا مخلوق تون اوار تیوہ بلوچ قوم آن خواست کیوہ کہ ببو تینا ایڑ لمّہ آتا توار جوڑ مبو و ننا جہد ئٹی ننتو ہم کوپہ مبو۔
