بلوچ یکجہتی کمیٹی (کراچی) نا ترجمان تینا شینک کروکو اسہ درشان ئسے ٹی پارے کہ ننا صلاح سندھ حکومت تون برجاء ئس ہراٹی اود ماڑی پور تون اوار کراچی نا ایلو ہند آتان بے گواہ مروکا بندغ تا یلہ مننگ نا یخین تسَسک و ننے دا پانگاسک کہ نن تینا برجاء کیمپ ءِ ایسر کین و تینا اُراتا کان۔اود دا کل بندغ آتا یلہ مننگ کن تینا پورو کردار ءِ ادا کرو ۔ولے ہڑدے نا وڑ دا ہیت آک بیرہ ہیت ئنا کچ اسکان سلیسر و دافتا ہچو عمل درآمد ئس کنگتو۔ بلکن دانا جہہ آ ہرافتا لسٹ ءِ نن سندھ حکومت ءِ تسوسن کہ اوفتے یلہ کہ ولے دُن متو و تدوکا دے تے ٹی پین بندغ آتے بے گواہ کنگانے۔
ترجمان نا مون مستی پاننگ ئس کہ لیاری سرگوت نا ہند آن تعلقداری تخوکو اسہ خوانندہ ئس ہرانا پن گلشاد ولد دلوش ءِ ہراد 26 ستمبر نا دے تینا منہ سنگت تون اوار ملیر آن پدی تینا اُراغا بننگ ئس اودے اونا سنگت سراج تون اوار سی۔ٹی۔ڈی کسر آ تورسہ زوراکی ئٹ بے گواہ کرے۔سراج ءِ تو ارا مسہ دے مہالو یلہ کرینو ولے گلشاد نا باروٹ کس ءِ ہچ سماء اف کہ اود ہرانگ و ہرا حالیت ئٹی ءِ۔گلشار اسہ خوانندہ سے و نن دا ہیت ءِ پک کننگ خوانہ کہ گر گلشاد ڈوہ ئس کرینے گڑا اودے کورٹ ئٹ پیش کبو و اونا ڈوہ ءِ پاش کنگے،ولے دا وڑ بندغ آتے کسر آ سلیفسہ زوراکی ئٹ بے گواہ کننگ دا تینٹ آئین و قانون نا برخلاف ءِ،اندا وڑ سعود ناز پنی او مارکوس ہرادے درو دیگر نا وخت آ وندر آن اونا ارا والا تا مون آ اودے زوراکی ئٹ ہرفیر و داسا اود ہراڑے کہ کس ءِ ہچ سماء اف، یاتی مرے کہ سعود ناز F.S.C نا خوانندہ سے۔گر گلشاد،سعود ناز و اوڑتون اوار ایلو بے گواک گواچنی ڈوہ دار او،گڑا اوفتے کورٹ آ اتنگے و اوفتا ڈوہ ءِ کورٹ نا مون آ مونی اتیر،داڑان پد انت سزا ئس تنگا او ننکن قابل قبول و تسلیم ءِ،ولے دا وڑ ماورائے عدالت زوراکی ئٹ بے گواہ کننگ ہچو حالیت ئسے ٹی قبول اف۔
ترجمان تینا بیان نا ایسر ئٹ پارے کہ نن حکومت سندھ آن خواست کینہ کہ او گلشاد،سعود ناز تون اوار ایلو بے گواہ انگا بندغ تے زوت یلہ کے گر اوفک ڈوہ ئس کرینو گڑا اوفتے کورٹ ئٹ پیش کبو۔نئے تون ایلو بے گواہ انگا بندغ تے یلہ کتورے گڑا نن دانا برخلاف اسہ سوگو او جُنز ئسے نا بناء ءِ کرون و دانا بر خلاف تینا بروکا لائحہ عمل تیار کرسہ برانز و تولوک برانز آتا پڑو ءِ کرون۔نن امیت کینہ کہ سندھ حکومت داٹی تینا پورو کڑدار ءِ سر ترو۔
