بلوچ یکجہتی کمیٹی نا کنڈ آن تربت ئٹی بالاچ مولابخش احتجاجی کیمپ ئے کوئٹہ غا دننگ نا پڑو کننگا، لانگ مارچ ئنا دروشم ئٹ کوئٹہ اسکان جتا شار تیٹ سلینگ و موبلائزیشن کننگو۔
شھید فدا چوک آ بالاچ مولابخش احتجاجی کیمپ ئنا دہمیکو دے پریس کانفرنس کرسا تولوک برانز اڈ تروکا پاریر کہ زوت برانزی کیمپ ئے لانگ مارچ نا دروشم ئٹ کوئٹہ غا دننگو و کالخواہ تیان انصاف خواہنگ مرو۔ تربت آن کوئٹہ اسکان دا نیام ئٹ جتا شار تیٹ الس ئے بیگواہ غا بندغ تا رھکوک آجوئی و دروغ ئنا مونتس تیٹ خون ئنا برخلاف موبلائز کننگو کن سلینگ مرو و بندغا تے دروغ ئنا مونتس و زوراکی نا بیگواہی و زوراکی تا برخلاف چاہنداری تننگو۔
او پاریر کہ دا تولوک برانز بیرہ شہید بالاچ ئے انصاف تننگ کن اف، بلکن بلوچ نسل کشی ئے توننگ کن بلوچ قوم ئنا تحریک ءِ۔ بلوچ نسل کشی نا برخلاف برجاء دا تحریک ئٹی خڑک ئنا علاقہ آتیان زوراکی ئٹ بیگواہ کننگوک بندغا تا خاؤت آتا بھلو کچ ئس اوار مسنے ہرافتیکن دا تحریک اوفتا ایسری سہارہ ءِ، او خواہرہ کہ اوفتا چُنا تا جون تے بالاچ، عبدالودود، شکور بلوچ و سیف اللہ نا وڑ نیم نن آ فیک انکاؤنٹر تا پنا کسر آتیا خسنگ مف۔ بیرہ سی ٹی ڈی آخہ بلکہ ریاستی مشینری نا ہر ارٹمیکو ادارہ بلوچ نسل کشی نا دا لڑ ئٹی برابر نا شریک ءِ۔ خواہ او پیرا ملٹری فورس مرے یا عدلیہ و بیوروکریسی ہرا نہ بیرہ دا تاغت آتا آسراتی تروک ءُ، بلکہ بلوچ قوم آ مروکا زوراکی تے ڈھکنگ ئٹی ہم اوار ءُ۔
