ریڈیو زْرمبش براہوئی | ریڈیو زْرمبش براہوئی,International-,antonio-Guterres,about-attacking-ambulances-in-palestine

ایمبولینس تیا اسرائیلی جلہو ننے خُلیس نا گواچی کرینے – گوٹیرس

ایمبولینس تیا اسرائیلی جلہو ننے خُلیس نا گواچی کرینے – گوٹیرس

NOV

05
05 / 11 / 2023 جہان 49

اقوام متحدہ نا سکریٹری جنرل انٹونیو گوٹیرس نا پاننگ ءِ کہ او غزہ ٹی ایمبولینس تا قافلہ آ اسرائیلی لشکر نا جلہو آن خُلیس نا گواچی ءُ و اسپتال آتان پیشن کسر آتا تالان جون آتا عکس آک اُست ئے ہسون کیرہ۔


اقوام متحدہ نا سکریٹری جنرل انٹونیو گوٹیرس عسکریت پسند ٹولی حماس و اسرائیل نا نیام ئٹ جنگ ئنا حوالہ ترسہ پارے کہ دا ویل بائدے داسا ایسر مرے۔


او پارے کہ غزہ ٹی بندغی حالیت ” بیم تروک‘‘ ءِ۔ داڑتون اوار او جنگ بندی نا خواست ہم کرے و ہفت اکتوبر آ حماس نا بنداوی ارش ئٹی یرغمال مروک بندغ آتا آجوئی نا ہم خواست کرے۔


فلسطینی ہلال احمر نا رد ئٹ اونا اسہ ایمبولینس غزہ سٹی اسپتال ئٹی پیہوکا کسر نا خڑک آ ”اسرائیلی لشکر نا کنڈ آن خَسوک میزائل ‘‘ نا گواچی مس۔ دا جلہو ئٹی 15 بندغ نا کہنگ و 60 آن گیشتر بندغ آتا ٹپی مننگ نا حوال مونا بسنے۔


ایلو کنڈ آ اسرائیل نا لشکر نا پاننگ ءِ کہ او اسہ ایمبولینس ئسے آ فضائی جلہو کرینے انتئے کہ لشکر شناخت کریسس کہ اودے حماس نا دہشت گرد سیل کارمرز کننگ ءِ۔


ہندن حماس نا کنٹرول ئٹ وزارت جانجوڑی نا رد ئٹ غزہ ٹی اسرائیلی جلہو تیٹ بیرانی تا کچ 9500 ئے سر مسنے۔ اوفتا رد ئٹ بیران مروکا تیٹ 3900 چُنا و 2509 زالبول ءُ، و بیران مروکا تیٹ 70 درسد کچ چُنا نیاڑی و پیر انگا تا ءِ۔


وزارت صحت نا جارکش نا رد ئٹ اوفتے 2000 گُم مروک بندغ آتا حوال رسینگانے ہرافتیان 1250 چُنا داسکان ڈھروکا ماڑی تا شیف آ ڈمب ءُ۔