ھیبرپکتونھواہ: زرباری وزیرستان ءَ پاکستانی لشکر ءِ سر ءَ بمب اُرشے ءَ دو کارمند مرتگ، ھیبر ءَ پاکستانی لشکر ءَ میڑے ءَ سلاہ بندیں مردمے ءِ کشگ ءُ دو سلاہ بندیں مردم ءِ دزگیر کنگ ءِ ٹاپار جتگ۔
پاکستانی لشکر ءِ رسانکدری بھرگ آئی ایس پی آر ءِ رد ءَ زرباری وزیرستان ءَ بمب تراکے ءَ پاکستانی لشکر ءِ دو کارمند سپاھی بنارس ھان ءُ سپاھی اَبدالکریم مرتگ اَنت۔ سپاھی بنارس ھان اورکزھی ءُ سپاھی اَبدالکریم ھیبر ءِ جھمنند اِنت۔
آئی ءَ ٹاپار جتگ ءُ گوشتگ کہ ھیبر ءِ ھند تیراہ ءَ لشکر ءُ سلاہ بندیں مردمانی میان ءَ میڑے ءَ یک سلاہ بندیں مردمے کشگ ءُ دو گوں ٹپی ئیں جاوراں دزگیر کنگ بوتگ اَنت۔ لشکر ءَ چہ سلاہ بندیں مردماں سلاہ ءُ سامان دستیگ کرتگ۔
زرباری وزیرستان ءَ پاکستانی لشکر ءِ سر ءَ بمب اُرش ءِ زمہ واری تھریک تالبان پاکستان ءَ منّ اِتگ۔
بنشون: دمگی اھوالکار / اکس: دامگ
