ریڈیو زْرمبش بلوچی | ریڈیو زْرمبش بلوچی

کراچی: وائس پار مسنگ پرسن آپ سند ءَ وتی شنگ کرتگیں درشانے ءَ گوشتگ کہ سی ٹی ڈی ءُ چیریں ادارہ سند ءَ کودکیں شاگرد ءُ سْیاسی کارکناں آوار جن اَنت ءُ زور بیگواہ کن اَنت آیانی سر ءَ دروگیں بھتام ءُ کیس جن اَنت پدر اِش کن اَنت۔ آئی ءَ گوشتگ کہ انام اباسی سند ءَ مسنگ پرسن ءِ پرکاریں سْیاسی سروکے، آئی ءِ میار ھمیش اِنت کہ آ پہ زور بیگواھیں مردماں توار چست کنت۔ آ ھمے توار ءَ گٹگیر کنگ لوٹ اَنت کہ پہ بیگواھیں مردمانی آجوئی ءَ توار چست کنگ ءَ کس پشت مہ کپ ایت۔ پمیشکا دیریگیں وھدے کہ سی ٹی ڈی ءِ کارمند دروگیں کیسانی بنیاد ءَ سند ءِ زور بیگواھیں مردمانی زْرمبشت ءَ نشانگ کنگ ءَ اَنت۔ آئی ءَ گوشتگ کہ سے روچاں پیش کراچی ءِ پپری گوٹ ءَ چہ وتی دزی ءِ دکان ءَ رینجر ءُ چیریں ادارھاں آوار جتگ ءُ زور بیگواہ کرتگ کہ شازدہ سالیگیں کودکیں شاگرد اَبید اللہ لانگاہ بیگواہ بیتگ، آئی مرچی آیان ءَ دروگیں ارزی نبشتگ ءُ ناشرکاری ءِ کیس ءَ پدر کرتگ۔ ایشی ءَ ما گوں ترندیں دانکاں ایر جن ایں آمیدگسی پَٹ ءُ پول کنگ ءِ لوٹ ءَ کن ایں، سند ءَ ھوار تیوگیں جھان ءِ مردمی اگبالانی گلانی گون ءَ لوٹ کن ایں کہ آ سند ءَ مردمی اگبالانی ناھکیں لپاشگ ءِ باروا توار چست بہ کن اَنت۔ آئی ءَ گوشتگ کہ سند ءَ پہ زور بیگواھیں کارکنانی آجوئی ءُ بندیگجاھاں پہ بندیگیں سْیاسی کارکنانی دروگیں کیس ءُ آزارانی بگیری ءَ چہ آئید ءِ شپ ءَ داں آئید ءِ روچ ءَ بیست ءُ چار ادارانی تہ ءَ یکشل ءَ زھرشانی کمپین ءِ جار ءَ جن ایں۔ بنشون: درشان | اکس: وی ایم سی