شال: پہ زور بیگواھیں مردم ءُ شھیداں برجاھیں شدکشیں زھرشانی گدان ءَ 5250 روچ سرجم بوتگ۔چارشمبے ءِ روچ ءَ بی ایس او شال ھنکین ءِ اگدہ دار بازیں کچے ءَ پہ ھمدردی درشان کنگ ءَ گدان ءَ آتکگ اَنت۔
آیاں شھید بالاچ مھمد بکش ءَ ستک شانی ندر کرتگ ءُ گوشتگ کہ پہ ماتیں سرڈگار ءَ شھیدانی تہ ءَ دگہ یکے گیش کنگ بوت کہ اِے دُژمن ءِ پروش ءِ منانک اِنت۔
آیاں دیمتر ءَ گوشتگ کہ چہ پاکستانی لشکر ءُ چیریں ادارھاں زانوگر ءُ سیاسی کارکن، سروک کس پھریز نہ اِنت۔ ریاست نہ تیوک ءَ آشوبی سیاسی مردماں شھید کنگ ءَ اِنت، بلکیں اھوالکار، لبزانکار، استاد ءُ ھمک بھرگاں سیادی داروکیں مردم پاکستانی لشکر ءِ نیمگ ءَ ناشریں زوراکیانی آماچ اِنت۔ سدانی کچ ءَ سیاسی کارکن زور بیگواھی ءَ پد آزار دیگ ءُ آیانی جون چگل دیگ بوتگ اَنت اے درچ گوں تیزی ءَ برجاہ اِنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ زور بیگواھیں مردم ءُ شھیدانی کھول زانت ءِ بنیاد ءَ گوں مھکمی ءَ میان استمانی راھبند ءِ رد ءَ زورگر ءِ دیم پہ دیمی ءَ کنگ ءَ اَنت۔ اے یک انچیں ریاستے آ پہ دروگ ءِ بنیاد ءَ جوڑ کنگ بوتگ۔ جھان ءِ مردمی ھکانی گلانی زمہ واری انت اے وڑیں ناشرکاریانی گِر ءُ دار ءَ بہ کن اَنت
بنشون: درشان / اکس: ماماکدیر
