ریڈیو زْرمبش بلوچی | ریڈیو زْرمبش بلوچی

شال: پہ زور بیگواھیں مردم ءُ شھیداں برجاھیں شدکشیں زھرشانی گدان ءَ 5040 روچ سرجم بیتگ۔ چارشمبے ءِ روچ ءَ چہ ھزدار ءَ سْیاسی ءُ چاگردی کارکن مھمد کریم، امام بکش، نورا ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔ وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ اے وھد ءَ بلوچستان جنگی جاورانی آماچ اِنت ژانگولیں جون چگل دیگ بیگ ءَ اِنت، مردم زور بیگواہ کنگ بیگ ءَ اَنت، جنین ریاستی آزارجاھانی تہ ءَ بندیگ اَنت ءُ کمشرپ کنگ بیگ ءَ اَنت۔ مردم نشانگ کنگ ءُ شھید بیگ ءَ اَنت، بلوچ مڈیانی لُٹ ءُ پل کنگ بیگ ءَ اِنت، گدان بمبگواری کنگ بیگ ءَ اَنت۔ بلوچ ءِ گسانی سر ءَ اُرش کنگ ءُ ماندارگ بیگ ءَ اَنت۔ ماما کدیر گوشتگ کہ پاکستان ءِ لشکری ءُ چیریں ادارہ یکشل ءَ بلوچانی کشت ءُ کوش ءَ کنگ ءَ اَنت، بلوچ ءِ ننگ لپاشگ بیگ ءَ اِنت۔ اے وھد ءَ کسی دست ساپ نہ اَنت، کس کودک نہ اِنت، اے وھد ءَ درسیں مردماں زور بیگواھیں مردمانی کھول کمک کنگ لوٹ اَنت۔ پہ اے گپ ءَ کس ودار مہ کنت، اے بلوچ ءِ گُڈی سْوَڑگ بہ بیت۔ ہر یکے ءَ چیزے نہ چیزے کنگ لوٹ ایت۔ آئی ءَ گوشتگ کہ چہ بلوچ سرڈگار ءُ بلوچ راج ءِ اے گرانیں درداں کزا یک سنگدلیں مردمے وتی ارساں داشت بہ کنت۔ اے بلوچ راج اِنت کہ اے گرانیں درد ءَ اوپار کنگ ءَ اِنت، چہ ھمے اوپاراں بازیں مردم پہ وت نپ چست کنگ ءَ اَنت۔ اے گرانیں دردانی اوپار کنگ بلوچ ءِ لاچاری اِنت چی ءَ کہ ایردستیں راج ءَ اَبید چہ اوپار کنگ ءَ دگہ وس نیست۔ ماما کدیر گوشتگ کہ بلوچاں چہ ھمے نادزرسی ءُ ایردستی ءَ پہ وتی پدریچ ءِ وشیں باندات ءَ راھے گچین کرتگ ءُ جھان ءَ ھمے کلوہ ءَ دیگ ءَ اَنت کہ ما پہ ایردستی ءِ زمزیلانی سندگ ءَ مدام ءَ پُرایمنیں جھد کنگ ءَ ایں۔ بنشون: درشان | اکس: ماما کدیر