ریڈیو زْرمبش بلوچی | ریڈیو زْرمبش بلوچی

شال: بیگواھیں بلوچانی توار ( وی بی ایم پی ) ءِ نیمگ ءَ پہ زورانسری بیگواھیں مردم ءُ شھیداں برجاھیں زھرشانی گدان ءَ 4780 روچ سرجم بیتگ۔ سے شمبے ءِ روچ ءَ چہ کیچ ءُ نسیر آباد ءَ سْیاسی کارکن ءُ بی ایس او پجار ءِ نودربر پہ ھمدردی درشان کنگ ءَ گدان ءَ آتکگ اَنت۔ وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ سی ٹی ڈی ءُ چیریں ادارھاں ھوار آدگہ لشکر چہ وتی زوراکیاں گوں بلوچ ءِ چکچینی ءِ شوندات ءُ کاروائیاں بلوچ ءِ جھد ءَ ھلاس کرت نہ کن اَنت۔ مئے دراجکشین جھد، شدکشین گدان ءُ دراجکشین لانگ مارچ پہ مزدانک ءُ اگبال ءَ زورانسری بیگواھی ءِ بگیری ءَ یک درورے جوڑ بیتگ۔ ما نہ کدی کسے ءِ دیم ءَ نزور بیتگ ایں ءُ نیکہ انگت ءَ بہ ایں۔ آئی گوشتگ کہ بلوچستان ءَ ریاست ءِ ناشرکاری زورانسری بیگواھی ءِ داستان ءَ سرجمیں جھان سرپد اِنت۔ آ جتاھیں گپے کہ جھان ءَ وتی چم بند کرتگ اَنت ءُ بے توار اِنت۔ روچے نہ روچے اے ریاست ءَ درسیں زوراکیانی ھساب دیگ لوٹ ایت۔ مئے اے پُر ایمنیں جھد داں درسیں بیگواھیں مردمانی آجوئی ءَ برجاہ بیت۔ ماما کدیر گوشتگ کہ امریکہ ءَ ھوار درسیں جھان اے ریاست ءِ کمک کنگ ءَ بند بہ کن اَنت، پمیشکا کہ ریاست چہ ھمے زْراں بلوچ ءُ آدگہ راجانی چکچینی ءَ کنگ ءَ اِنت۔ ریاست ءَ زورانسری بیگواھی ءِ درچ یکشلہ برجاہ داشتگ۔ پاکستان میان استمانی رھبند ءِ بگیری ءَ کنگ ءَ اِنت۔ چو آدگہ دمگانی وڑ ءَ پاکستان میان استمان ءِ رھبند ءِ رد ءَ دارگ بہ بیت ءُ آئی ءَ پہ بلوچ چکچینی ءِ باروا جُست کنگ بہ بیت۔ بنشون: درشان | اکس: ماما کدیر