شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5244 روچ سرجم بوتگ۔ آدینگ ءِ روچ ءَ چہ کوہ ءِ سلیمان تونسہ ءَ بلوچستان نیشنل پارٹی ءِ کارکن مھمد اشرپ بزدار، جینیوا کیسرانی، ابوبکر بزدار ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءَ سیاسی کارکن، نودربر، استاد، کماش، زھگ ءُ جنین ھمک بھرگاں سیادی داروکیں مردم زور بیگواہ کنگ بنت۔ گوستگیں بیست سال اِنت کہ اے درچ یکشل ءَ گوں تیزی ءَ برجاہ اِنت۔ داں انوں شست ھزار ءَ گیش بلوچ زور بیگواہ کنگ بوتگ۔
آئی ءَ گوشتگ کہ بلوچستان ءَ چوشیں جاھے پشت نہ کپتگ کہ کسے زور بیگواہ کنگ نہ بوتگ۔ زور بیگواھیں مردمانی کھولاں بیست سال اِنت کراچی، شال، اسلام آباد ءُ بلوچستان ءِ جتا جتائیں ھند ءُ دمگاں زھرشانی کنگ ءَ اَنت بلے زھرشانی ءِ آسر ءَ زور بیگواھیں مردمانی آجوئی ءَ اَبید آیانی ژانگولیں جون دست کپتگ اَنت۔
ماما کدیر گوشتگ کہ دُژمن زور بیگواھیں مردمانی آزارجاھانی تہ ءَ کشگ بندات کرتگ بندیگجاھاں مردمانی گون ءَ رستری کنگ ءُ آیانی جوناں چگل دیگ ءَ اِنت۔ چہ دزکپتگیں جوناں کسے ءِ دست پرشتگ ءُ کسے ءِ چم کش اتگ اَنت۔ بلوچستان ءَ چوشیں گس نیست چہ چیریں ادارھانی زوراکیاں رک اِتگ۔
بنشون: درشان /اکس: ماما کدیر
