شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5202 روچ سرجم بوتگ۔ آدینگ ءِروچ ءَ سیاسی کارکن بازیں کچے ءَ پہ ھمدردی درشان کنگ ءَ گدان ءَ آتکگ ءُ آیاں شھید نزیر اھمد ءَ سُھریں دْروت ندر کُرتگ ءُ گْوشتگ کہ چہ آئی ءِ شھیدی ءَ ماتیں سرڈگار ءِ شھید ءَ یکے گیش بیتگ ءُ اے دُژمن ءِ پروش ءَ پدر کنت۔
آیاں تران کنان ءَ گْوشتگ کہ چہ پاکستان ءِ چیریں ادارہ ءُ لشکر ءَ ھچ سیاسی کارکن، سروک پھریز نہ اِنت،ریاست ایوک ءَ آشوبی سیاسی مردماں شھید کنگ ءَ اِنت بلکیں کلانھیں اھوالکار ءُ کلانھیں استاداں پاکستانی واکداراں نشانگ کُرتگ اَنت۔سدانی کَچ ءَ سیاسی کارکنانانی بیگواہ کنگ ءَ پد ژانگولیں جون چگل دیگ بیتگ اَنت۔زورگِر ءَ گوں وتی ناشرکاریاں دمگ تباہ کُرتگ کہ اے مردمگری ءِ کوش زانگ بیت۔
وی بی ایم پی ءِ کمک سرکماش ماما کدیر ءَ گوں مردماں تران کُرتگ ءُ گْوشتگ کہ بیگواھیں مردم ءُ شھیدانی کھولاں میان استمانی کامودانی رد ءَ پہ مھکمی ءُ باسمائی زوراک ءِ دیم پہ دیمی ءَ کنگ ءَ اَنت۔ یک ھچیں ریاستے کہ پہ ھیلہ ءُ دروگ جوڑ کنگ بیتگ جھان ءِ بے تواری میار بار یے۔جھان ءِ ھمک گل ءِ وپاداری ھمیش اِنت کہ چوشیں سِلکاراں چہ مردمانی چاگرد ءَ ھلاس بہ کن اَنت چے ءَ کہ چہ ایشی ءَ ھچ راج ءِ ایمنی ءُ شاتکامی سرجم نہ بنت، چوشیں ریاست کہ پہ دروگ ءُ ھیلہ جوڑ کنگ بیتگ وتی جوڑ کُرتگیں ناشرکارانی پارست ءَ لس مردماں تُرسینگ ءَ اِنت۔
بنشون: درشان / اکس: ماما کدیر
