شال: پہ زور بیگواھیں بلوچانی پدجنگ ءَ شدکشیں زھرشانی گدان ءَ 5232 روچ سرجم بوتگ۔ سے شمبے ءِ روچ ءَ چہ کراچی لیاری ءَ سیاسی ءُ چاگردی کارکن مھمد رمزان، مھمد ایسا ءُ امجد پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءَ پاکستانی لشکر ءِ چکچینی برجاہ اِنت۔ جتا جتائیں ھند ءُ دمگاں چیریں ادارہ، سی ٹی ڈی ءُ پاکستانی لشکر ناشرکاری کنگ ءُ بلوچ پسگاں زور بیگواہ ءُ شھید کنگ ءَ اَنت۔
آئی ءَ گوشتگ کہ پاکستان ءِ زوراکیانی ھال جھان ءِ تہ ءَ تالاں بوگ ءَ اِنت پمیشکا اے توار ءِ دارگ ءَ پاکستان ءِ درسیں ادارہ زور کارمرز کنگ ءَ اَنت۔ بلے بلوچ راج ءَ زورگریں پاکستانی ادارھانی زوراکیاں ابید وتی پرایمنیں جھد برجاہ داشتگ۔
ماما کدیر گوشتگ کہ میان استمانی ادارہ بلوچ پسگانی زوریں بیگواھی ءُ شھید کنگ ءُ بلوچستان ءِ زوریں دستیگ کنگ ءِ بگیری ءَ میان استمانی کانود ءِ رد ءَ وتی کرد ءَ پیلو مہ کنت گڑا بلوچستان ءِ جاور گنتر بنت۔
آئی ءَ گوشتگ کہ پاکستان ءَ تچکی ءَ میان استمانی ادارھانی کمک گوں اِنت۔ پاکستانی لشکر بلوچ آبادیانی سر ءَ اُرش کنگ ءَ اِنت لکانی کچ ءَ بلوچ بے گِس اِنت۔ ھزارانی کچ ءَ زور بیگواہ کنگ ءُ چیریں آزارجاھاں بند کنگ بوتگ اَنت۔ میان استمانی مردمی ھکانی ادارہ بلوچستان ءِ جاوراں مان آرگ ءَ نہ اَنت۔
بنشون: درشان / اکس: ماما کدیر
