شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5228 روچ سرجم بوتگ۔ شمبے ءِ روچ ءَ بی ایس او ءِ کارگشاد سمند، رسانکدری کارگشاد شکور، بنجاھی پتر ءِ باسک کامریڈ اسرار ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ مردمی گوستانک اے گپ ءِ گواہ اِنت جھان ءِ تہ ءَ کجام دمگ ءَ زوراکی ءِ بگیری ءَ چست بوتگیں توار گوں زوراں دارگ نہ بوتگ اَنت ءُ نیکہ بنت۔ زروگراں مدام نزوریں راجانی پر ایمنیں جھد ءِ بگیری ءَ زوراکی کرتگ ءُ نزور راجانی ایردست کنگ ءِ جھد کرتگ، زوراکی ءِ درسیں وڑ ءُ پیم چکاس اِتگ اَنت، گوں بلوچ راج ءَ ھم ھمے وڑ کنگ بوگ ءَ اَنت۔
ماما کدیر گوشتگ کہ چہ بلوچاں پد پشتون ھنداں ھرنائی ءَ چہ چنچو ماہ اِنت لشکرکشی بوگ ءَ اِنت، پشتون ورنا آوارجنگ ءُ آیانی گِس ماندارگ بوگ ءَ اَنت۔ بیا اِت بلوچ ءُ پشتون ھواری ءَ اے ایردستی ءِ سانکلاں پروش دیگ ءَ پر ایمنیں جھد ءَ بھر بزور اِت۔
آئی ءَ گوشتگ کہ نوں جیڑگ لوٹ ایت کہ ھمک بلوچ ءُ پشتون زورگریں ریاست ءِ زوراکیانی آماچ اِنت کسے ءِ زھگ، کسے ءِ برات ءُ کسے ءِ پت شھید کنگ بوتگ یا چیریں آزارجاھاں بندیگ اِنت۔ گوں ھمک مردم ءَ ریاست ءِ نیمگ ءَ زوراکیانی کنگ بوگ ءَ اِنت۔
ماما کدیر گوشتگ کہ ھزارانی کچ ءَ مردم زور بیگواہ اَنت ھمک مردم ءِ سر ءَ پرز اِنت کہ زور بیگواھیں مردمانی کھولانی ھال ءَ بہ گیت کہ آیانی آزیز پہ مئے وشیں باندات ءَ پاکستانی لشکر ءِ چیریں آزارجاھاں رنج اوپار کنگ ءَ اَنت۔ ھمک مردم گوں آیاں یکجھتی بہ کنت ءُ اے پر ایمنیں جھد ءَ ھوار بہ بیت۔
بنشون: درشان / اکس: ماما کدیر
