شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5194 روچ سرجم بیتگ۔ دوشمبے ءِ روچ ءَ چہ مند ءَ سیاسی ءُ چاگردی کارکن اَبدُالستار، داد مھمد، مھمد ابراھیم ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ چونیں ھم زانوگرے مئے اے گپ ءَ نہ منّ اِت نہ کنت کہ وھدے دُژمن ترس آماچ بوت آ گیش رستری کنت۔ چہ دُژمن ءِ زوراکیاں جھد گیش توانمند بیت۔
ماما کدیر گوشتگ کہ بلوچ ورنا سوڑگ بہ کن اَنت چہ دیوان ءُ مچیاں سسائی تماھاں در بیا اَنت ءُ سرڈگار ءُ زور بیگواھیں مردمانی آجوئی ءُ مات ءُ گھارانی کمک جوڑ بہ بنت ءُ جوانیں گامگیج بزور اَنت اگاں نہ چہ اے نزوری، ترس آماچی ءُ نابودیاں بلوچ راج ءِ نام ءُ نشان گار بیت۔
آئی ءَ گوشتگ کہ اکتوبر ءِ ماہ ءَ بلوچ ءِ سرڈگار ءَ دُژمن ءِ تیرانی نشانگ بیتگیں پسگان ءَ وتی دلبند ءَ واپینتگ۔ پہ سرڈگار ءَ ندر بیتگیں پسگاں گوں یکے دومی گلگ بیتگ، بلے آیاں ناشریں دُژمن ءُ راجدروھانی ناچ کنگ اوپار نہ کرتگ۔
ماما کدیر گوشتگ کہ مرچی بلوچانی دیمونی ءِ درچ ءَ زرمبشت ءِ تہ ءَ یک جزبگے ودی کرتگ ءُ جھدکار چہ وتی ھوناں نازرکیں جان ءَ اوپار کرتگیں دُژمن ءِ رستری آزاراں نبشتہ کنگ ءَ اَنت۔ مرچی بلوچ ءِ ھمک شھید ءِ رتکگیں ھونانی ترمپ گوستانک نبشتہ کنگ ءَ اَنت۔
بنشون: درشان / اکس: ماما کدیر
