شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5220 روچ سرجم بوتگ، پنچ شمبے ءِ روچ ءَ بی ایس او ءِ کارگشاد سمند، ھنکین ءِ کارگشاد کبیر، بنجاھی پتر ءِ باسک کامریڈ اسرار ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءَ زوریں بیگواھی ءِ جیڑہ سک ترسناک اِنت ءُ زوریں بیگواھی ءِ درچ گوں ترندی ءَ برجاہ اِنت۔ ھزارانی کچ ءَ بلوچ سیاسی کارکن پاکستان ءِ چیریں آزارجاھاں بندیگ اِنت۔ ھزارانی کچ ءَ درکانودی شھید کنگ ءُ آیانی ژانگولیں جون چگل دیگ بوتگ۔
ماما کدیر گوشتگ کہ چنچو مردمانی جون دزکپتگ درس سیاسی کارکن، دانشور، نودربر ءُ استاد بوتگ اَنت۔ انگت ءَ دگہ ھزارانی کچ ءَ بلوچ پاکستانی چیریں آزارجاھاں بندیگ اِنت۔ پہ زور بیگواھیں مردمانی یل کنائینگ ءَ ھچ وڑیں گامگیج زورگ نہ بوتگ۔
ماما کدیر گوشتگ کہ پاکستانی چیریں آزارجاھاں بندیگیں مردم ھمک روچ مرگ ءِ دیمپانی ءَ کنگ ءَ اَنت۔ بلے پاکستان سرکار میاربار اِنت اے جیڑہ ءِ منّگ ءَ جاڑیگ نہ اِنت ءُ پہ میان استمان ءِ رد دیگ ءَ دیوان برجم دارگ ءُ کمیٹی جوڑ کنگ ءَ اِنت۔ داں انوں یکے ءَ ھم دلجمیں گزارشے پیش نہ کرتگ۔
بنشون: درشان / اکس: ماما کدیر
