سند: اسلام آباد ءَ زھرشانی ءَ نشتگیں زور بیگواھیں مردمانی کھولانی گون ءَ پولیس ءِ زوراکی کنگ ءِ بگیری ءَ سند ءِ شھر ھیرپور ھاس ءَ زھرشانی روانک ءَ ھواریں چار سندی کارکن پولیس ءَ دزگیر کنگ ءَ پد بیگواہ کرتگ۔
زور بیگواہ کنگ بوتگیں سندی کارکنانی نام وکی سنجوانی، گوتم پرکاش، نند لال ءُ وشھال داس اِنت۔ پنجاہ ءِ نزیک ءَ دگہ پرکاریں سیاسی ءُ چاگردی کارکنانی سر ءَ پاکستان ءِ بگیری ءَ اوگام جنگ ءُ گھگیری کنگ ءِ ایپ آئی آر نبیسگ بوتگ۔
کراچی ءَ ھوار سند ءِ جتائیں شھراں بلوچ یکجھتی کمیٹی ءِ زھرشانیاں ھوار بوگ ءِ بگیری ءَ ایپ آئی آر کرتگیں مردمانی دزگیر کنگ ءِ ھال اِنت۔
یات بہ بہ اِت کہ اسلام آباد ءَ پولیس ءِ زوراکیانی بگیری ءَ سند ءَ جسکم، سند سجاگی پورم، وائس پار مسنگ پرسنز آپ سند، سند سھبا، یونائیٹڈ پارٹی ءُ سند ءِ دگہ جتائیں راجدوستانی پارٹیانی نیمگ ءَ گوستگیں پنچ روچ اِنت کہ زھرشانیانی درچ برجاہ اِنت۔
