سند: بلوچ یکجھتی کمیٹی ءِ نیمگ ءَ اسلام آباد ءَ برجاھیں زھرشانی نندانک ءِ سر ءَ پولیس ءِ بیڑ برگ ءُ جنین ءُ زھگانی لٹ شاپ ءُ دزگیر کنگ ءِ بگیری ءَ سرجمیں سند ءَ چار روچ ءَ زھرشانی کنگ بوتگ۔
سند ءِ شھر کراچی ءُ ھیدر آباد ءَ سند سجاگی پورم، جسکم، جیئے سند کومی مھاز ءُ وائس پار مسنگ پرسنز آپ سند ءِ نیمگ ءَ زھرشانی روانک کشگ بوتگ۔ ھیدر آباد ءَ سند سجاگی پورم ءِ سروک سارنگ جویو، مھب آزاد لگاری، وائس پار مسنگ پرسنز آپ سند ءِ سروک سسی لوھار، سھنی جویو ءُ جسکم ءِ سروک اسمائیل نوتکانی ءِ سروکی ءَ زھرشانی روانک کشگ بوتگ ءُ ھیدر آباد پریس کلب ءِ دیم ءَ مچ بوتگ اَنت۔
آیاں گوں اھوالکاراں تران کرتگ ءُ گوشتگ کہ پاکستان ریاست بلوچستان ءَ بلوچانی چکچینی ءَ کنگ ءَ اِنت۔ بلوچستان ءِ تہ ءَ ھزارانی کچ ءَ بلوچ کارکن زور بیگواہ کنگ بوتگ ءُ نوں سی ٹی ڈی ءِ دست ءَ زور بیگواھیں ورنا کشگ ءُ آیانی ژانگوکیں لاش چگل دیگ بوگ ءَ اَنت۔
آیاں گوشتگ کہ ریاست ءِ زوراکیانی بگیری ءَ بلوچ سروک ڈاکٹر مھرنگ، سمی دین مھمد ءُ گلزار دوست ءِ سروکی ءَ بلوچ چکچینی ءِ بگیری ءَ چہ تربت ءَ زھرشانی روانک در کپتگ ءُ اسلام آباد ءَ سر بوتگ۔ روانک ءِ سر ءَ ریاست ءَ وتی درسیں زور چکاس اِتگ اَنت۔ ایشی ءِ بگیری ءَ ما سرجمیں سند ءَ وتی زھرشانیاں برجاہ دار ایں۔
آیاں گوشتگ کہ سند وتی درسیں بلوچ برات ءُ گھارانی درد ءُ رنجاں سرپد بیت ءُ گوں آیاں زھرشانی ءَ کمک کنت۔ سندی ءُ بلوچ مدام یک بوتگ اَنت ءُ ھمک درد ءُ رنج ءَ ھم سنت بوتگ اَنت۔
