ریڈیو زْرمبش بلوچی | ریڈیو زْرمبش بلوچی

ما نہ زان ایں کہ مئے کوم چُوش پَرچا ناسرپد اِنت؟ زاناں چُوش چی ءَ بے سما اِنت؟ اِے راج انگت سرپد نہ اَنت کہ ما گُلام ایں، ما یکشل ءَ لگتمال اِیں ءُ ما زلیل اِیں۔ ھر گورے ءَ چمّاں شاَنک بہ دے اِت ءُ بِچار اِت زاناں کُجا مارا اِزتے رَسگ ءَ اِنت! ھر روچ ما بے اِزّت بُوگ ءَ ایں۔ مئے لَج ءُ مئے ننگ ءُ ناموس!! گِندئے ھرروچ ما کم شرپ بُوگ ءَ اِیں۔ مئے مات ءُ گُوھار مئے بْرات ءُ کماش، زان ئے چی ءَ؟ چے بہ گْوش ایں!!! بس مئے میار ھمیش اِنت کہ ما وتی ھَک ءِ سر ءَ اُوشتاتگ اِیں، گُڑا ما پرچا انگت وتی زُبان ءَ نہ وان ایں؟ گِند ئے ما مُدام ھمے ھبر گِپتگ ءُ داشتگ کہ مئے وانگجاہ بلوچی وانینگ نہ بیت اِنت پمیشکا ما بلوچی نہ زان اِیں! اڑے ناسرپد اگاں مئے وانگجاھاں بلوچی وانینگ بوتیں گُڑا ما پہ وتی زبان ءَ پرچا اینکس جُھد ءَ کُتگ اَت۔ گُڑا ما پرچا پہ زُبان ءَ چوش پریشان بوتگ ات ایں۔ بچار اِت کہ انوں بازیں زُبان دوست ءُ راجدوستاں بلوچی ءِ بازیں وٹس ایپی وانگجاھے پچ کُتگ کہ چہ ھمے برورد ءَ بلوچ نودربر بلوچی وانگ ءُ دربرگ ءَ اَنت۔ گُڑا باید اِنت ما ءُ شما دْراہ اِد ءَ بلوچی ھم وان ایں، دربر ایں ءُ راج ءَ ھم بوانین ایں۔ ھو اِے گپ راست اِنت کہ مئے وانگجاھاں بلوچی ءِ واست ءَ گامگیج زورگ نہ بیتگ ءُ ناں کہ بوتیں چی ءَ کہ مئے دُژمن نہ لوٹ ایت کہ بلوچ وتی ماتیں ، راجی زُبان ءَ بُوان ایت ءُ دائم ھمے جُھد ءَ کنت کہ بلوچ پُشت ءَ بہ کپ ایت ءُ بلوچ وتی زُبان ءَ شموشکار بہ بیت۔ بلوچ کہ ھست اِنت وتی زُبان واست ءَ ءُ وتی کوم واست ءَ چوشیں گامگیج مہ زور ایت، گُڑا انگت من ءُ تو ھمے گپْ ءَ جَن ایں کہ مارا بلوچی کس ءَ نہ وانیتگ! بلوچ برات ءُ گْوھاراں گوں شُما دزبندی اِنت کہ بلوچی بوان اِت ءُ وتی کوم ءَ ھم بوانین اِت ۔ پہ بلوچی زُبان ءِ دیمروی ءَ ما شمُے ھمراھداری ءَ لوٹ اِیں۔ شالا بلوچی دیمروی کنات ءُ بلوچ یکمُشت بہ بات۔ آمین