ریڈیو زْرمبش بلوچی | ریڈیو زْرمبش بلوچی

تو بلوچے ئے ، ترا پجّارے ھست ، ترا زندگی یے ھست ، ترا زبانے ھست ، ترا زمینے ھست ، ترا راجدپترے ھست ءُ تئی کرّ ءَ ھرچ ھما چیز ھست اَنت کہ یک کومے ءِ کرّ ءَ الّمی اَنت بلے تئی کرّ ءَ آجوئی نیست کہ یک کومے ءِ واستا سک الّمی اِنت ، بے آجوئی ءَ تئی ھچ چیز نہ مان ایت ۔ گُلامی ءِ سانکل تئی ھرچ چیز ءِ پروش دیگ ءُ ھلاسی ءِ واستا وتی پُرزوریں کوشست ءَ برجم کنت کہ تئی پجّار یا تئی کوم ءِ نام ءُ نشان گار بہ بیت ۔ آجوئی ءِ جُتائیں چاڑ ءُ لزّتے ، آجوئی جُتائیں زندگی یے ءِ واھُند اِنت ۔ تئی پجّار یا کوم ھما وھد ءَ رکّ ایت کہ تو آجو بہ بہ ئے ۔ تو کہ آجو بہ ئے گڑا تو وتی مُلک ءِ واھُند وت بہ ئے ، ترا کس اوں دست جَت نہ کنت ۔ آجوئی ءَ پیسر گُلامی ءِ اَھد ءَ ترا وتی پجّار ( راجدپتر ، زبان ءُ ھرچ ھما چیز کہ تئی پجّار اَنت ) الّمی ءَ رکّینگ لوٹ ایت ءُ ھمے پجّیگ ءَ ترا آجوئی ءِ واستا جھد ھم الّم کنگ لوٹ ایت کہ تو آجو بہ بہ ئے ۔ ترا وتی پجّار ءُ آجوئی ءِ واستا جھد کنگی اِنت ۔ اے جھد ءِ میان ءَ ترا وتی درستیں واھشت ببا دیگی اَنت ۔ اے جھد اگاں تئی کرّ ءَ تئی سر ءَ ھم بہ لوٹ ایت گڑا وتی سر ءَ ھم جھد ءِ دیم ءَ ایر بہ کن ۔ آجوئی ءُ پجّار ءِ جھد پُرایمن نہ بیت بلکیں دردبُرّ بیت ۔ اے جھد تئی جان ، تئی سر ، تئی واھشت درستاں بارت ءُ بس تئی واھشت آجوئی ءُ پجّار بنت ۔ پجّار ءِ رکّینگ ءِ واستا ترا وتی ھست ءُ گوست دوئیں وانگی اَنت ۔ ترا وتی راجدپتر ، زبان ، دودمان یا بلکیں ھرچ ھما چیز کہ چہ آیاں تئی پجّار زاھر بیت ، ھما چیزانی زانگ ءُ وانگ تئی سر ءَ ھژدری اِنت ۔ چو نہ اِنت کہ تو اردو گپ کن ئے ءُ پُچ ءُ پوشاک بلوچی گور ءَ کن ئے کہ من وتی پجّار ءَ رکّینگ ءَ آں ، اے وڑ ءَ ھچبر تو پھتوئیں جھدکارے گُشگ نہ بہ ئے ۔ پجّار ءِ رکّینگ ءِ واستا ترا بلوچ ءِ درستیں راجی چیزانی منّوگرے الّم بوگی اِنت ۔ ھمے پجّار ءِ رکّینگ ءِ ھمراھی ءَ بلوچ ءَ را پہ آجوئی ءِ آرگ ءِ واستا جنْگ الّم کنگی اِنت ۔ دُگنیا ءِ راجدپتر ءِ گیشتریں مُلک یا کوماں چہ جنْگ ءَ آجوئی گپتگ ۔ نو بلوچ ءَ را ھم آجوئی ءِ دست گرگ ءِ واستا جنْگ الّم کنگی اِنت ۔ بے جنْگ ءَ تو آجو نہ بہ ئے ءُ تو ھچبر یک پُرایمنیں زندے ءِ واھُند نہ بہ ئے ۔ بلوچ ءِ پجّار ءِ رکّینگ ءُ بلوچ ءِ واستا آجوئی ءِ آرگ ءِ جھد ءِ تہ ءَ ھرچ بلوچ بچ ءِ ھوار بوگ الّمی اِنت ۔