ریڈیو زْرمبش بلوچی | ریڈیو زْرمبش بلوچی

دانکہ پہ سمی ءَ پیداک نہ بیت دودایے پہ تئی دودا ءَ کدی بیرگیریں بالاچ نہ بیت بلوچ راجدپتر ءِ تہ ءَ بالاچ تھنا یک مردمے ءِ نام نہ اِنت، بلکیں یک کردے ءِ نام اِنت۔ پگر ء بالاچ مُدام دُژمنیں زورگرانی بگیری ءَ گھگیری کنگ ءِ نام ءَ زانگ بنت۔ اگاں مردمے کِرد ء بالاچ ءِ بارو ءَ پَٹ ءُ پول کنگ بہ لوٹ ایت، گڑا درساں پیش بالاچ ءِ گورگیج ءِ کوھیں کرد دیم ءَ کیت۔ بالاچ ءِ گورگیج ھما کرد اِنت کہ آئی ءِ بارو ءَ بلوچ ءِ زھگ زھگ شر سرپد اِنت ءُ زانت، چہ بالاچ گوگیج ءِ کوھیں کِرد ءَ ھمُک مردم سانمنْد اِنت ءُ وتی زھگانی ناماں بالاچ کنگ لوٹ ایت۔ چوش کہ بلوچ راج ءِ تہ ءَ بالاچ نامیں مردم سک ءَ باز اَنت، بلے آیانی تہ ءَ بس لھتیں مردم پگر ء بالاچ ءِ راہ ءَ جُنزاں اِنت ءُ کرد ءِ بالاچ ءَ پیلو کنگ ءَ اِنت۔ آ پہ وتی لَجّ ءُ سرڈگار ءِ پاسبانی ءَ زورگریں دُژمن ءِ بگیری ءَ مِڑگ ءُ شھیدی ءِ گْرانبھائیں نام ءَ کٹّگ ءُ بلوچ راجدپتر ءِ تہ ءَ پہ مُدامی وت ءَ زندگ کنگ ءَ اَنت۔ وھدے بلوچ سرڈگار ءِ سر ءَ پہ زورگریں پاکستان ءِ بگیری ءَ جنگے بندات بیت گڑا پہ ماتیں سرڈگار ءِ پاسبانی ءَ شھید بالاچ مری زورگریں پاکستان ءِ بگیری ءَ وتی جھد ءَ برجاہ داریت ءُ داں وتی زندگی ءِ گُڈی دمان ءَ جنگ کنت ءُ وت ءَ بلوچ راجدپتر ءِ تہ ءَ پہ مدامی نمیران کنت۔ پہ سرڈگار ءِ آجوئی ءِ جھد ءَ چو آدگہ بامردانی وڑ ءَ کرد ء بالاچ ءِ لڑے زورگریں پاکستان ءِ بگیری ءَ مڑگ ءُ نمیران بیگ ءَ اِنت۔ ھمے وڑ ءَ بلوچ راجی بامردیں شھیدانی لڑ ءَ کِرد ء بالاچانی تہ ءَ شھید اسد بالاچ، شھید ھدایت اللہ بالاچ، شھید نوربکش بالاچ، شھید وھید بالاچ، شھید پدائی انیل بالاچ ءُ شھید ممتاز بالاچ ھوار اَنت،، ( اگاں دگہ شھیدیں بالاچے ءِ نام پشت کپتگ پھلی لوٹ آں) ءُ راجدپتر ءِ تہ ءَ پہ مُدامی نمیران اَنت۔ مرچیگیں روچ 25 جنوری شھید ممتاز بالاچ ءِ شھیدی ءِ سالروچ اِنت کہ آئی ءَ 25 جنوری 2022 ءَ پہ ماتیں سرڈگار ءِ دیمپانی ءَ دَشْت سبدان کھیر کور ءَ زوگریں لشکر ءِ بنجل ءِ دستیگ کنگ ءِ وھد ءَ گوں لگوریں دُژمن ءَ دیم پہ دیمی میڑ ءَ شھید بوتگ ءُ پہ مدامی نمیران اِنت۔ من مرچگیں روچ ءِ درگت ءَ شھید ممتاز بالاچ ءَ گوں بلوچستان ءِ آدگہ شھیداں سھرچکیں دْرت ندر کن آں۔ من ھمے گپّ ءَ گْوشگ لوٹ آں کہ پگر ء بالاچ چہ بلوچ راج ءَ ھمے لوٹ ءَ کنت کہ پہ وتی ماتیں سرڈگار ءِ رکّینگ ءُ زُوراکانی بگیری ءَ کرد ء بالاچ زندگ دارگ ءُ جھد کنگی اِنت۔ اے مئے ایمان اِنت کہ بلوچ راج پہ ماتیں سرڈگار ءُ ننگ ءِ پاسپانی ھمُک وھد ءَ بالاچیں پُسگ ودی کنت ءُ پہ ناشریں زوراکانی بگیری ءَ وتی جنگ ءَ برجاہ دار اِیت۔