ریڈیو زْرمبش بلوچی | ریڈیو زْرمبش بلوچی

دزاپ: ایرانی سرکار ءِ نیمگ ءَ شنگ کنگ بیتگیں درشانے ءَ گوشگ بیتگ کہ بلوچ جنین ءِ آوار جنگ ءُ ناھکیں کوش ءِ میار ءَ شش مردم دزگیر کنگ بیتگ۔

بلے سرکار ءِ نیمگ ءَ میاربارانی نام ءُ نشان پدر کنگ نہ بیتگ اَنت۔ یات بہ بہ اِت کہ سمیر ءُ آئی ءِ لاپ پُریں لوگبانک ھانی گل چہ پھرہ ( ایرانشھر ) ءَ آوار جنگ بیتگ اِت اَنت ءُ پد ءَ سراوان ءَ آیانی ژانگولیں جون دزکپتگ اِت اَنت۔

ھانی گل بلوچستان ءَ مردمی ھکانی کارکنے بیتگ ءُ 14 مئی 2019 ءَ پاکستانی لشکر ءَ گوں نسیم ءِ ھواری ءَ آوار جتگ ءُ بیگواہ کرتگ۔ چہ ماھے ءَ گیش زوریں بیگواھی ءَ پد ھانی یل کنگ بیتگ ءُ نسیم انگت بیگواہ اِنت۔ ھانی گل چہ پاکستانی لشکر ءِ چیریں آزارجاھاں یل کنگ ءَ پد پہ نسیم ءِ آجوئی ءَ زھرشانیاں بھر بیتگ۔ ھانی گل ءُ سمیر ءِ کوش ءَ لھتیں روچ پیش رودرآتکی بلوچستان ءَ کیچ ءِ بنجاھی شھر تربت ءَ سمیر ءِ برات رؤپ برکت ھم مھتر مھمد ءِ بد گوشگ ءِ دروگیں بھتام ءَ کشگ بیتگ اَت۔

بنشون: دمگی اھوالکار | اکس: دامگ