دزاپ: بلوچ یکجھتی کمیٹی ءِ نیمگ ءَ پہ زوریں بیگواھی ءُ بلوچ چکچینی ءِ بگیری ءَ برجاھیں زھرشانی نندانک ءِ سر ءَ پولیس ءِ بیڑ برگ ءُ مردمانی لٹ شاپ ءُ دزگیر کنگ ءِ بگیری ءَ روکپتی بلوچستان ءِ جتائیں ھند ءُ دمگاں دیوال نبیسگ بوتگ اَنت۔
دیوالانی سر ءَ نبشتگ کہ ڈاکٹر مھرنگ زندگ بات، ڈاکٹر مھرنگ تھنا نہ اِنت، بلوچ چکچینی بند کنگ بہ بیت۔ دیوالانی سر ءَ پارسی زبان ءُ بلوچی زبان ءَ مرگ بَر پاکستان ءُ پاکستان مُردگ بات ءُ بلوچستان زندگ بات نبشتگ۔
یات بہ بہ اِت کہ تربت ءَ وتگڑیں سی ٹی ڈی ءِ دروگیں میڑا شھید بالاچ ءُ آئی ھمراھانی کوش ءِ پژدر ءَ چست بوتگیں زرمبشت بلوچستان ءِ جتائیں ھند ءُ دمگاں تر ءُ گرد کنگ ءُ مردمانی یکجاہ کنگ ءَ پد زی بیگاہ ءَ اسلام آباد ءَ سر بوتگ ءُ دوشی اسلام آباد پولیس ءَ زھرشانی کنوکیں مردم آوار جتگ اَنت۔
اسلام آباد ءَ بلوچ یکجھتی کمیٹی ءِ نیمگ ءَ برجاھیں زھرشانی ءِ سر ءَ پولیس ءِ بیڑ برگ ءُ زھرشانی کنوکیں مردمامی دزگیری ءِ بگیری ءَ رو درآتکی بلوچستان ءِ جتائیں ھند ءُ دمگاں، شال، تونسہ، ڈیرہ گازی ھان، ھاران، تربت، گْوادر، کلات، وڈ، ھب چوکی ءُ چہ بلوچستان ءَ ڈن ملیر کاٹور ءُ ملتان ءَ ھم زھرشانی کنگ بوتگ۔
رودرآتکی بلوچستان ءِ جتائیں جاھاں شھدگ بند کنگ بوتگ اَنت ءُ مساپر سکا جنجالانی دیمپان بوتگ اَنت۔
بشون ءِ رد ءَ مرچی اسلام آباد پولیس ءَ دزگیر کرتگیں مردم گوشتگ اَنت کہ ما شمارا شال ءَ دیم دیں بلے زھرشانی کنوکیں مردماں پولیس ءِ گپ رد کرتگ ءُ گوشتگ کہ ما پہ زھرشانی کنگ ءَ آتکگ ایں ما ھچ وڑ ءَ شال ءَ نہ رو ایں۔
اسلام آباد پولیس ءِ زوراکیانی بگیری ءَ بلوچ یکجھتی کمیٹی ءَ تیوگیں بلوچستان ءَ تھتگ بند ھرتال ءِ جار جتگ۔
