روکپتی بلوچستان سئے شمبے 19 ستمبر 2023 ءَ ماں سرباز ءِ شھر راسک ءَ بیگاہ ءِ ادار چار ءُ نیم ءَءَ بلوچی زبان ءِ نامداریں لچہ کار مبارک کازی ءِ یات ءَ لچہ گوشی ءُ گشتانکی دیوانے برجم دارگ بیتگ۔ دیوان ءِ بُنگیج گوں بانُک ریھانہ نبات زھی ءِ کُران وانی ءَ بندات کنگ بیت۔ دیوان ءِ جارچین ایوب ایران نژاد بیتگ۔
راسک ءِ ارشاد اسلامی ءِ کارمستر لال بکش بلوچ زھی ءَ اتکگیں مھمان وش اتک کرتگ انت ءُ انچوش بلوچی ءِ وانینگ ءِ باندات ءَ کہ ایم شکاری ءِ استادی ءَ برجم دارگ بیتگ ءُ آئی تران کرتگ۔
گوشتانکی بھر ءَ برکت برجان ءَ گشتانک دیان ءَ گْوشتگ کہ کازی اھد سازیں کارستے بیتگ ءُ کازی ھما مردم بیتگ آئی ءِ زند ءَ مردماں شرپ داتگ ءُ مزن لیکھگ بیتگ۔ بلوچی ءِ وانگ ءُ زانگ ءَ سکین ئِے داتگ۔ ھما مردماں کہ راسک ءَ بلوچی سیاھگ ءِ راست نبیسگ ءُ وانگ در بُرتگ مُراد بات ئِے گوشتگ انت۔
ایم شکاری ءَ راسک ءَ برجم داشتگیں بلوچی کلاس ءِ باندات ءَ گپ ءُ تْران کرتگ ءُ گوشت کہ پہ زبان ءَ جُھد کنگ پہ وتی زند ءَ جُھد کنگ انت۔ زبان زندگ بیت راج زندگ بیت۔
مولابکش رئیسی ءَ گشتانک دیان ءَ گوشتگ کہ اگاں بلوچی پشت مہ کپ ا یت بلوچ ھم پشت نہ کپ ایت۔ دنیا ءِ مستریں جُھد زبان ءِ زندگ دارگ ءِ جُھدانت پر چہ کہ زبان راجانی مستریں پجّارانت
بانُک سیما دادور ءَ پہ مبارک کازی ءِ لیلویے دیوان ءَ پیش کرتگ۔ جبار دلدار ءَ گُشتانک ءِ جاہ ءَ وتی لچّہ پہ دیوان ءَ ونتگ اَنت۔
یھیا چیدگ ءَ وتی دستونکے دپگال کرتگ ءُ پد ءَ کازی ءِ نام ءَ دگہ لچھے درنگازاتگ۔ مھراب بَرَم ءَ وتی لچھے دپگال کرتگ۔
بلوچی زبان ءِ نامداریں لچّہ ءُ کار ءُ ندکار ءُ پولکار آبد آسکانی ءَ بُنگیج ءَ سید ھاشمی ءِ لچّہ ءِ بندے پہ دیوان ءَ ندر کرتگ ءُ پد ءَ کازی ءِ جند ءِ باندات ءَ موتکے دپگال کرتگ۔ پد ءَ گوشتانک دیان ءَ گْوشتگ کہ اینچو کازی گوں من ءَ ھور بیتگَ گوں کس ءَ ھور نہ بیتگ۔ من ءُ شھید سبا دشتیاری ءُ کازی سَکّ باز ھور بیتگ ایں ۔ مبارک ءَ داں زند ءِ گُڈّی پاساں آرام نیست اَت ۔ کازی ءَ وتی زند ءِ شرتریں چیز بزاں یکیں ورنائیں چُک پہ ھاک ءَ داتگ۔ روچے یک گاڑی ءِ ڈرائیورے بلوچ ءَ زاہ داتگ سید ھاشمی ءَ اے زاہ تورایت ءُ چہ گاڑی ءَ ایر کپ ایت ۔ مبارک ءِ لچہ ءِ تہ ءَ تو بلوچ ءِ زند ءِ دْراھیں دردانی درنگازی ھوارانت ۔ اگاں مئی راج ءِ جنین آدم بہ وان انت مئی راج دیم ءَ رَوت۔
ساوَڑ برجان ءَ کازی ءِ بیرانی ءِ درگت ءَ وتی لچھے دیوان ءَ پیش کرتگ۔ میرین آسکانی ءَ مولوی ابداللہ روانبد ءِ لچّہ ءِ چیزے بند دیوان ءَ پیش کرتگ اَنت ۔ گُڈّ سر ءَ میرین ءَ آبد آسکانی ءِ لچھے دیوان ءَ گوں وَشگُٹی ءَ دپگال کرتگ۔ ابدالواھد وداریگ ءَ وتی دستونکے دیوان ءَ پیش کرتگ۔ اکتردیدگ ءَ وتی دستونکے مبارک کازی ءِ نام ءَ دیوان ءَ ندر کرتگ۔ رپیک رھچار ءَ وتی لچّھے دیوان ءَ پیش کرتگ ءُ گشتانک دیان ءَ گوشت کازی اھد سازیں لچّہ کارے بیتگ ۔ آبد زھیر ءَ وتی دستونکے دیوان ءَ ندر کرتگ۔ مھبوب پائز ءَ دستونکے دیوان ءَ پیش کرتگ۔ تارک ھُسین ھوت ءَ کازی ءِ لَچّھے ،،، ھانی منی ماتیں وتن ،،،، دیوان ءَ دپگال کرتگ۔ ارپان ءَ ماتی زبان ءِ درگت ءَ لچّھے دیوان ءَ پیش کرتگ ءُ دیم ءَ گوشتانک دیان ءَ گوشتگ کہ پہ مردم ءَ انچوش ساہ ءِ زیرگ ھژدری انت، ھمے داب ءَ مردم ءَ پہ وتی زندگ دارگ ءَ زبان پکار ءُ ھژدری انت ۔ کازی ھما کارست انت کہ ھر کُنڈ ءِ بلوچے آئیءَ پَجّہ کارایت۔ گلام ھُسین داد ءَ لچھے پہ دیوان ءَ ندر کرتگ ءُ گُشتانک ءَ دیان ءَ گوشتگ کہ پیسر ءَ آ دیم ءَ (رو دراتکی بلوچستان ءَ )بلوچی زبان ءِ دیوان برجم دارگ بیتگ انت بلہ چیزے موسم اِنت کہ من روبرکپتی بلوچستان ءَ ھم بلوچی زبان ءِ دیواناں گندگ ءَ آں کہ برجم دارگ بیگ ءَ اَنت۔ مھاز کلمتی ءَ کازی ءِ پرپندے دیوان ءَ پیش کرتگ۔ زبیر زیب ءَ وتی پربندے دیوان ءَ پیش کرتگ۔ منزور داد ءَ ھم وتی پر بندے دیوان ءَ پیش کرتگ۔ میرجان میر ءَ بلوچی زبان ءِ وانینگ ءِ درگت ءَ تْران کرتگ ءُ گْوشتگ کہ بلوچی ءِ زندگ دارگ زند ءِ مستریں کار انت ۔اے دیوان بلوچ ءِ زندگ ءِ مانزمان انت۔ مھمد پھرھی ءَ بلوچ زھگانی ادبی گل ءِ باندات ءَ گُشتانک دات ءُ کتابے کہ زھگانی ادب ءِ باندات ءَ چہ ھمے گل ءِ نیمگ ءَ چاپ کنگ بیتگ داد ءِ دروشم ءَ راسک ءِ بلوچی زبان ءِ نودربراں ندر کرتگ انت۔ دیوان ءِ گُڈسر ءَ بلوچی کلاس ءِ وانوکاں داد دیگ بیتگ۔ دیوان شپ ءِ ھپت ءُ بیست ءَ ھلاس بیتگ۔
بنشون: اھوالکار/ اکس: اھوالکار
