ماتیں وتن ءِ شیر مزاریں سرمچار کہ پہ گُلزمین ءِ پھازگ ءَ مُدامی دْروشم ءَ نہ تھنا گوں دُژمِن ءَ جنگ کن اَنت، بلکیں آ دُژمِن ءَ را تباہ ءُ برباد کن اَنت ءُ پْروش دے اَنت۔ ماں گْوپشان ( نومبر ) ءِ روچاں پسنی ءَ بِہ گر داں کراچی ءِ دگ ءِ سر ءَ بلوچ سرمچارانی جنگی رِپکاں نہ تھنا پاکستان ءِ چاردھیں سپائیگ کُشت اَنت ءُ جھنم ءَ سر کُت اَنت، بلکیں دُژمِنیں ریاست ءِ زرّی نو آبادیاتی شوربندی ھم بے سوب کنگ ءَ یک مزنیں کردے پیشداشت۔
گْوادر پسنی زیرو پوائنٹ ءَ جنگ ءِ سیاھیں جمبراں آزمان پوش اِتگ اَت، بی ایل ایپ ءَ یک جنگی اسکواڈے ءِ سرچمّگ ءَ راکٹ لانچرز، بمب ءُ توپ، تیر ءُ تُوپَک ءُ آ دگہ جنگی ساز ءُ سامان یکیں ھساب ءَ پسنی زیرو پوائنٹ زِرّی مزنیں دگ ءِ نیمگ ءَ دیم ءَ جُنزان اَت۔ ڈڈّریں کوہ، رُنگراھیں راہ، تیزیں گْوات ءُ ھَور ءَ ھم سرمستانی کدمانی یکشلیں تْرندی داشت کُت نہ کُت اَنت۔ گْوادر انچوش کہ چائنا پاکستان اکنامی کوریڈور ءِ بُنجاہ گْوشگ بیت اُود ءَ پاکستان آرمی ءُ پرینٹر کانسٹیبلری ءِ ھزاراں کچّ ءَ سِپائیگ سرپ بندی کنگ بوتگ۔
پنجاب ءِ نشتگیں کمانڈر ءُ کورکمانڈر ءِ گُمان ءَ ھم نہ اَت کہ سیکیورٹی ءِ بُنجاہ گْوادر پسنی ءِ مزنیں دگ ءِ سر ءَ آیانی سر ءَ اے پیمیں بلاھیں اُرشے بیت کُت کنت۔ پاکستان ءِ پوج ءَ اے گُمان نہ اَت کہ بی ایل ایپ ءِ میجر ءَ وتی جنگی سوڑگ ءُ شوربندی وتی سنگتانی دیم ءَ پیش کُتگ اَت کہ آ چہ سرجمیں جنگی شوربندی ءَ تیار اِت اَنت۔
بلوچ راج ءِ نتُرسیں جنگجوھاں آپ، تْرندیں ھَور، تیزیں گْوات، ءُ رُنگراھیں راہ پُروش دات اَنت ءُ پسنی زیرو پوائنٹ بدوک ءَ پہ دُژمِناں بے اُوپاری ءَ ماں وتی گِپتگیں پانگساں ودار کنگ ءَ اِت اَنت۔ اے اُرش ءِ جنگی شوربندی انچو جوان اَت کہ پاکستان ءِ آرمی ءُ آئی ءِ چیریں تْرامگیجاں ماں کوھاں سرمچارانی یک پدے ھم نہ دیست۔ سَے گْوپشان ( نومبر ) دو ھزار بیست ءُ سَے ءِ روچ ءِ یک کلاک چِل مِلٹّ ءَ پاکستانی آرمی ءِ دو پوجی موٹل ھوار یک کاروانے ءَ پسنی زیرو پوائنٹ ءَ بِہ گِر داں اُورماڑہ ءَ روان اَت، بلے آ سرپد نہ اِت اَنت کہ ملکموت آوانی سر ءَ اُوشتاتگ۔ بی ایل ایپ ءِ مزن جگریں جنگی اسکواڈ دُژمِن ءِ وش آتک ءَ پہ بے اُوپاری ءَ ماں سنگر ءَ ودار کنگ ءَ اَت۔
بلکل دو کلاک بیست مِلٹّ ءَ پاکستان آرمی ءِ کاروان ءِ نزّیک ءَ راکٹ لانچرز ءُ ٹوپ ءُ بمبانی توار بندات بوت اَنت ءُ تْراکّانی ءُ تیرانی توارانی سَوَب ءَ سرجمیں پسنی زیرو پوائیٹ لرزینتگ اَت۔ لھتیں مِلٹّاں پد راکٹ لانچرز ءُ آسی تیراں دُژمِن ءِ دوھیں پوجی موٹل تباہ کُت اَنت ءُ آیانی تہ ءَ چاردہ سِپائیگ کُش اَنت ءُ جھنم ءَ دیم دے اَنت، بلے بی ایل ایپ ءِ کربان بنزہ ءَ مُرتگیں پوچیانی ساز ءُ سامان ھم وتی کبزہ ءَ کن اَنت ءُ چہ اُود ءَ در ھم کا اَنت۔ گْوادر ءَ زُورگِریں پوج ءِ ھاتِر ءَ سُتکگیں لاشانی نِدارہ ءَ پیش کنگ ءَ ات اَنت۔
سُتکگیں موٹلانی سیاھیں دُوت ماں آزمان ءَ شِنگ اِت اَنت۔ گْوادر ءَ بِہ گِر تاں پسنی بدوک ءُ کلمت ءَ بِہ گر تاں بدوک ءَ پوجی موٹلانی دْراجیں کتار لگ اِتگ اَت ءُ اے اُرش ءَ پنڈی ءِ نشتگیں جرنل ءُ کربلانی پادانی چیریں زمین کشّ اِت۔ پاکستانی پوج باز سُر ءُ پُر کنگ ءَ اَت بلے پاکستانی پوج ءِ مجگ کار ءَ نہ اَت کہ اے سرمچار چہ کُجا اتک اَنت اُرش اِش کُت ءُ چہ کُجا شُت اَنت۔ آ زمین ءَ وارت اَنت یا آزمان ءَ چو برمودہ ٹرائینگل ءِ ڈول ءَ لَپّم ات اَنت۔ آیاں ماں آزمان ءَ ھر نیمگ ءَ چہ نوکیں جاسوسی کیمرہ ءُ گائیڈڈ میزائیل ءَ ڈرون گندگ بُئےَگ ءَ اَت ءُ گن شپ بالی پٹ ءُ شیلنگ ءِ تواراں گْوادر، پسنی ءُ اُورماڑہ ءِ زِرّی نیمگ سر ءَ زُرتگ اَت۔ پاکستانی پوج ءَ کلئیرنس آپریشن ءِ جار جتگ اَت۔ گْوادر ءَ بِہ گِر تاں اُورماڑہ، کولواہ، ھوشاپ، تُربَت ءُ پیدراک ءَ پوجی آپریشن ءِ سرکل اڈّ کُتگ اَت، تاں دوازدہ روچاں شپ ءُ روچ چہ جاسوسی کیمرہ ءُ گائیڈڈ میزائیل ءَ ڈرون ماں آزمان ءَ گردش کنگ ءَ اِت اَنت پاکستانی پوج یکرندے پد ءَ بلوچ سرمچارانی دیم ءَ لاچار اَت۔
اِیشی ءِ مستریں سبوت اِیش اِنت کہ پاکستانی پوج ءِ کورکمانڈر لیفٹیننٹ جنرل آسپ گپور تُربَت ءِ دوران ءَ پاکستان ءِ کُمکّارانی یک ھاسیں دیوانے ءِ تہ ءَ پاکستان ءِ پوج ءِ تاوان ءِ بارہ ءَ گوں دلپروشی، تکانسری ءُ کینگ ءَ کمکّاراناں دْراھیں مردُمانی دیم ءَ دُژمان دنت ءُ بے اِزّت کنت۔ بی ایل ایپ ءِ انیگیں اُرش ریاست پاکستان ءِ سیاسی، ملیٹری، ءُ زِرّی سُود (interest) ءِ سر ءَ یک مزنیں اُرشے اَت کہ پاکستان ءِ نیمگ ءَ سی پیک ءُ گْوادر پورٹ ءِ کارانی سر ءَ پہ سیکورٹی ءَ جُست ھم چِست بوت۔
بلوچستان ءِ آجوئی لوٹوکیں گلّانی بگیری ءَ گْوستگیں دو سالاں پاکستان ءِ ڈرونی اُرش سوبمند بوتگ اِت اَنت۔ دومی نیمگ ءَ گْوادر ءِ اُرش ءِ تہ ءَ چاردہ پاکستانی پوجی کُشگ بوتگ اَت، آیانی توپ، بمب، راکٹ لانچرز، ءُ آ دگہ ساز ءُ سامان کبزہ بوتگ اِت اَنت، ءُ چہ اُود ءَ پہ سلامتی در آیگ ءَ پاکستان ءِ گروناکی پروشت۔ اے گپّ ءَ یات بِہ دار اِت پہ پاکستان ءَ اے اُرش ءِ سان ڈالچار کنگ ءُ وتی بے سوبی ءَ را چیر دَیگ ءِ ھاتِر ءَ آئی ءَ اولی سر ءَ سے بیگواہ کُرتگیں ورناہ ماں بالگتر ءَ یک موٹلے ءَ را بمب بست ءُ تْراکینت ءُ آ شھید بوت اَنت۔ اِیشی ءَ چہ ابید تُربَت ءَ دِگہ چار بلوچ ورناہ پیک انکایونٹر ءِ نام ءِ سر ءَ شھید کُت اَنت ءُ ناشرکار (دھشتگر) زاھر کُت اَنت، بلے آیانی تہ ءَ شھید بالاچ ھم گون بیت۔
