یک نیمگے بلوچانی زھرشانی پہ وتی بیگواہ ءُ کُشگ بوتگیں دوستاں ماں پاکستان ءِ دلبند ءَ ءُ یک نیمگے بلوچستان ءِ بلوچانی سیاست کہ ھمے زھرشانی ءَ ھم پہ ووٹ ءِ پِنڈگ ءَ کارمرز کنگ ءَ اَنت۔
یکے بلوچستان نیشنل پارٹی ءِ سروک اکتر مینگل دیم ءِ جار ءَ جَنت کہ بلوچستان ءِ گورنر ءُ نگران وزیر ھالہ اسلام آباد ءَ بہ رواں یا کہ جیڑھاں گیش ءُ گیوار بہ کناں یا کہ چہ وتی زمہ واریاں دز کَش بہ بنت ءُ یکے ملا ھدایت الرھمن تربت ءَ داں گوادر موٹل ءُ پرپٹانی ھواری ءَ پہ زھرشانی کنوکانی پلہ مرزی ءُ ووٹ پنڈگ ءِ جار ءَ سرجمیں گوادر ءَ پِرّین ایت کہ من زندان دیست بلے وتی ھمت دور نہ دات پہ اے وڑیں مردماں لھتے شرمناکیں دانک گشگ نوکیں گپے ھم نہ انت بلے مہ کن ات ھم نہ بیت۔۔۔
زھرشانی ءَ نشتگیں مردمانی لوٹ ووٹ نہ انت کہ شُما گوں زھرشانی ءِ تُپنگ ءَ وتی ووٹ ءِ تیر ءَ آس دیگ لوٹ ات۔ اے گپ ءَ ھمک سرپدیں مردم زانت کہ پاکستان ءِ پارلیمانی سیاست ءِ بُنکی گپ بے گیرتی انت کہ اگاں نہ بئے ترا جاگہ اِنت ءُ بے گیرت ءَ ماں بلوچ چاگرد ءَ جاگہ نیست۔
ھما زھم کہ پیسری سیاست داناں جتگ کہ شُما جن ات اش۔ بلے بژن اد ءَ پہ ھما لس مردماں گیشتر بیت کہ ھمک رند ءَ اے ووٹ پنڈوک گوں نوکیں آدینکے ءَ کاینت ءُ ھمک رند ءَ اے مردم رد کپ اَنت۔ مولانا کہ زندان ءِ ٹاپار ءَ جنت گڑا مرچاں بلوچ پولیس لاک اَپ زندان ءَ نہ گُش ایت ءُ زوریں زندان ءِ درداں تئی وڑیں دو تل ءُ دو پوستیں سیاستداں ازل داں ابد مار اِت نہ کن اَنت۔ لھتے لبز پہ پلہ مرزی ءَ دور دیگ ءُ پد ءَ انچیں کرد کنگ کہ آ زھرشانی ءِ وَدّینگ ءِ مانزمان بنت،پلہ مرزی گُشگ نہ بیت بلکیں اے وڑیں مردم ءَ گُشاں آستینک ءِ مار زبان ءِ تاب دیگ ءَ ھچ نہ بیت وتی گُمان ءَ تاب دئے پہ بزگیں بلوچان ٹاپار مجن بلکیں جار بجن کہ ما بلوچستان ءِ تہ ءَ چہ سالاں بوکیں چُکچینی ءُ زُلم ءِ ھلاپ ءَ آؤکیں ووٹ ءَ چہ چوں دزکش بوت کُت کن ایں؟
اے بیگواھی ءِ درداں مار ات کن ایں۔؟ اِنّاں۔۔۔ پرچا کہ شُما پہ دل وتی پُچّاں ھم مٹ کُت نہ کن ات،دل ءِ مَٹّ کنگ دیریں بَٹاکے اینچو مردم کہ شُمئے لوٹوک انت اشاں زیر بیا پہ زھرشانی ءَ یا کہ بس اینچو بگش کہ ووٹ بزاں بوٹ انچو کی سر ءِ پُٹانی تہ ءِ بوٹ۔۔۔
چہ درستاں پیسر شُمارا شُمئے جوڑ کنوک پروش(کَٹ لوز) اَنت۔ دروگیں مُچّی ءِ مُزّ ھمیش انت کہ ھزار اَنت ءُ گُبار اَنت ءُ راستی ءِ مُز ھمیش انت کہ چار اَنت بلے ھمراھدار اَنت۔ شُما دیریں پہ اسلام آباد ءَ سر گپتگ ات ءُ تئی ھزارانی مھلوک ءِ دَنز گندگ نہ بنت ءُ راستی ءِ پیگمبرانی لھتے باسک تئی سرجمیں ریاست ءَ دار دپ ءَ دیگ ءَ انت۔۔ اگاں کسے ھست کہ آ گُش ایت من ھمراھاں اے زھرشانی ءِ کہ بزگیں بلوچاں پہ وتی آؤکیں پدریچ ءَ ماں شیتان آباد(اسلام آباد) ءَ برجاہ داشتگ گڑا ھکیں ھمراھداری ھمیش انت کہ بس چہ ریاستی گچینکاری ءَ وتا دزکش بہ کن ات۔۔۔
