بلوچ راجی زرمبشت ( بی این ایم ) ءِ مردمی ھکانی ادارہ پانک ءَ ماں رسانکدر ءَ زوریں بیگواھیانی تیز بوگ ءِ پژدر ءَ وتی شنگ کرتگیں درشان ءَ گوشتگ کہ بلوچستان ءَ گوستگیں سے روچ ءَ پاکستانی لشکر ءَ دگہ شش مردم زور بیگواہ کرتگ۔
آئی ءَ گوشتگ کہ ما بلوچستان ءَ زوریں بیگواھی ءِ تیز بوگ ءَ گوں ترندیں دانکاں ایر جن ایں۔ 15 نومبر ءَ چہ گومازی ءَ اللہ داد مسلم، ھمے روچ ءَ چہ پسنی ءَ دودا ناسر، تمپ ءَ مسلم الی، 17 نومبر ءَ لومز زانشتجاہ اوتل ءَ سمیر، چہ ھزدار ءَ لیاکت سالھ ءُ مرچی لیاکت سکی داد چہ کوڑاسک ءَ آوار جنگ بوتگ۔ اے دمگ ءَ مردمی ھکانی لپاشگ ءِ جاور ناگیگ بوگ ءِ گمان ءَ دیگ ءَ اَنت۔
آئی ءَ گوشتگ کہ اے گپ سکا تورناک اِنت لیاکت سکی داد ءِ کھول 2012 ءَ پاکستانی لشکر ءِ جوڑ کرتگیں کشندہ ٹولی ءِ دست ءَ زوراکی ءَ اوپار کنگ ءَ اِنت۔ آئی ءِ پت سکی داد ناھک ءَ کشگ بوتگ۔ مردم ءُ کھولانی اے یکشلیں نشانگ کنگ نہ تیوک ءَ مردمی ھکانی بگیری اِنت بلکیں ریاست ءِ سروکی ءَ بیوکیں زوراکی سکا رنجانی گیش کنگ ءِ گمان ءَ دیگ ءَ اِنت۔
پانک ءَ گوشتگ کہ ما چہ زمہ واراں جست گرگ ءِ لوٹ ءَ کن ایں کہ اے ویلانی بارو ءَ زوت پٹ ءُ پول کنگ بہ بیت۔ ما میان استمان ءَ زور دیں آ پاکستان ءِ سپارتکاراں ترند بہ کن اَنت اے ناھکیں مردمی ھکانی بگیریانی گر ءُ گامگیج بزور اَنت ءُ مردمی ھک ءُ انساپ ءِ لوٹاں پیلو بہ کن اَنت۔ بلوچستان ءِ مردم چہ زوریں بیگواھی ءِ برجاھیں ترس ءَ در آھگ ءُ وشھالیں زندمانے گوازینگ لوٹ اَنت۔ آیانی پھازداری ءُ دیمروئی ءِ دلجمی دیگ مئے ءُ شمے ھواری ءَ زمہ واری بیت۔
بنشون: درشان / اکس: مونوگرام