ریڈیو زْرمبش بلوچی | ریڈیو زْرمبش بلوچی

چوناھا ما ھرکس وت ءَ زُبان دوست ءُ راجدوست گْوش ایں بلے ما روچ ءِ یک ساھتے ءَ ھم وتی بلوچی وانگ ءُ دربرگ ءِ جُھد نہ کن ایں۔ راستی ءَ پہ وانگ ءُ دربرگ ءَ جُھد لوٹ ایت، گِند ئے ما دہ یا دوازدہ سال پہ دری زُبانانی وانگ ءُ دربرگ ءَ جن ایں بلے ما وتی راجی زُبان ءِ دَرونتاں نہ وان ایں۔ بلوچ نودربر بے دَرونتانی وانگ ءَ یکشل ءَ رَد نبشتہ کن اَنت ءُ وڑ وڑیں گپاں ھم گْوش اَنت انچوشکہ "من بلوچی نہ ونتگ، من نہ زان آں یا نبیسّگ ءَ سُست آں پمیشکا رَدی وَ بیت" چہ ایشی ءَ ھوار لھتیں سنگت وتی نابودی ءُ بے اگلی ءَ بلوچی زُبان ءِ بتلے گْوش اَنت “پیریں کپوت رامگ نہ بیت“ بزانکہ اے وڑیں وتواہ وتی بے گناھی ءِ منّانک ءَ گوں ھمے بلوچی بتل ءَ دے اَنت کہ ما مزن ءُ پیر بیتگیں پمیشکا انی بلوچی گوں ما وانگ ءُ زانگ نہ بیت یا من دَرونتاں ھیل کُت نہ کن آں۔ گِند ئے اِے وڑیں دلپروش، ناسرپد ءُ اشتاپکاریں بلوچ وانِندھاں سرپدی دیگ لوٹ ایت کہ بلوچی مئے وتی جِند ءِ زُبان اِنت ءُ وتی جِند ءِ زبان ءِ وانگ ءُ دربرگ ءَ جُھد وَ نہ لوٹ ایت پرچا کہ ما وتی زُبان ءَ وت گپ کُت کن ایں، ونت کن ایں ءُ سرپد ھم بَہ ایں پمیشکا بلوچ راج ءَ وتی جِند ءِ زُبان بلوچی راست نبیسّگ ءَ تھنا دَرونت دلگوش کنگی اَنت۔ اگاں کَسے اِے بتل ءَ رَد کارمرز بکنت گُڑا ما آئی ءَ گْوش ایں چوناھا تو بلوچے ئے پمیشکا تو وتی ماتی ءُ راجی زُبان ءَ وت ونت کن ئے، سرپد ھم بہ ئے گُڑا اِے ھم پہ ما گنج اِنت۔ اگاں ما پارسی، ھِندی ءُ انگریزی ءِ وڑیں دری زُبانانی وانگ ءُ دربرگ ءَ دہ سال جن ایں گُڑا باید اِنت کہ ما یک ماھے وتی زُبان ءِ وانگ ءُ دربرگ ءِ جُھد ھم بہ کن ایں کہ بلوچی مئے مات ءِ داتگیں انامت اِنت پمیشکا گْوش اَنت کہ بلوچی مئے ماتی زُبان اِنت۔ باید اِنت ما چہ دُرستاں پیسر بلوچی دَرونتاں بوان ایں ءُ پد ءَ کم کم ءَ نبشتہ بکن ایں۔ یک روچے ءِ تہ ءَ کس مُلا جوڑ نہ بیت پمیشکا شمارا کَس نہ گْوش ایت کہ بلوچی ءِ دْراھیں دَرونتاں یک روچے ءِ تہ ءَ بوان اِت یا شُما رَد نبشتہ بکن اِت۔ گِند ئے راستی وَ ایش اِنت کہ شُمئے وڑ ءَ پیسر ما دْراہ بلوچی وانگ ءُ نبیسّگ ءَ نزور اِت ایں بلے ما وتی جُھد برجاہ داشت ءُ مرچی ما وتی راجی زُبان ءَ وش ءُ راست نبشتہ کُت کن ایں۔ بزانکہ راجی زُبان ءِ دربرگ ءَ اشتاپ نہ لوٹ ایت بلکیں پہ لھتیں روچ ءَ وانگ ءُ دربرگ لوٹ ایت، زُبان دوستی ءُ راجدوستی ءِ مارشتاں لوٹ ایت۔ چوناھا مئے راج ءِ مستریں نزوری ھمیش اِنت کہ ما کَس ءَ دلگوش نہ کن ایں۔ ما لوٹ ایں کہ مارا ھرکس دلگوش بہ کنت، مئے رَد نبشتگیں نبشتانک ءُ شئیراں ھرکَس بوان ایت بلے ما کسی گپاں اشکُنگ ءُ سرپد بیگ ءَ تیار نہ ایں۔ گُڑا باید اِنت ما اول بلوچی دَرونت، زُبان دوستی ءُ راجدوستی نبشتانکاں وانان کن ایں کہ گوں وانگ ءَ سرپدی رس ایت۔ وھدیکہ ما وتی اے نزوری شر کُتگ اَنت گُڑا ما وتی راجی زُبان ءِ راست نبیسّگ ءَ وت زبر بَہ ایں ءُ دُنیا ءِ دِگہ راجانی وڑ ءَ ما بلوچ ھم دیمروی کن ایں۔ یک گپے گْوش آں کہ بلوچی گوں انگریزی آباں نبیسّگ ءَ مارا ھچ پائدگ نہ رس ایت بلکیں بلوچی گوں انگریزی آباں نبیسّگ وھد ءِ زیانی اِنت پمیشکا ما گوں شما دزبندی کن ایں کہ بلوچی ءَ گوں انگریزی آباں نبشتہ مہ کن اِت، بلکیں مُدام وتی راجی زُبان ءَ گوں *بلوچی آباں* نبشتہ بِہ کن اِت کہ شُمئے وتی زُبان ءَ آب ھست اَنت۔ اگاں ما بلوچی ءَ گوں بلوچی آباں نبشتہ کن ایں گُڑا ما کم کم ءَ بلوچی نبشتہ ھم ھیل کن ایں۔ ھر روچ بلوچی ءِ یک دَرونتے لازُم بوان اِت کہ شُما بلوچی نبشتہ ءِ بُنرھبند(گرائمر) ءَ سرپد بِہ بَہ اِت۔ ھر وھد ءَ چیزے نبیسّ اِت گُڑا وتی نبشتگیں لبز ءُ گالرِداں دوبر وت لازم بوان اِت ءُ وتی رَدیاں راست بہ کن اِت۔ چوناھا دُنیا ءِ ھر شریں نبشتہ کار، کالج ءُ یونیورسٹیانی پروپیسر، شھزانت ءُ کارسر(آپیسر) بے چمشانک ءَ وتی کلوہ ءُ نبشتگیں چیزاں راہ نہ دے اَنت، بزانکہ اشتاپ نہ کنگی اِنت بلکیں مارا وتی رَدی وت راست کنگی اَنت، چہ وتی رَدیاں دربرگی اِنت اگاں ما رَدیانی راست کنگ ءِ جُھد بِہ کن ایں گُڑا ما وتی راجی زُبان ءَ وت دربر ایں۔ اُمیت اِنت کہ اے وڑ ءَ شما ھر یکے وتی راج ءِ نودربر ءُ وانِندھاں ھم سرپدی دے اِت کہ مارا بلوچی وٹس ایپی وانگجاھاں ھوار بیگی اِنت، وتی دزھُورکی ءِ وھد ءَ وتی راجی زُبان وانگ ءُ نبشتہ کنگی اِنت ءُ راج ھم وانینگ اِنت۔ سلامت بات اِت، وت ءَ راجی زُبان ءِ سرمچار جوڑ بکن اِت، بلوچ ءُ بلوچی شالا دیمروی بکنات۔