اے کوڑھیں امروز ءَ پہ کس ءَ وپا نہ بیت اے جھان ءَ ھر کس کیت ءُ روت بلے لھتیں انچیں مردم ھم ھمے بنی آدمانی تہ ءَ درکیت کہ آ چہ اے جھان ءَ رَو اَنت بلے وتی یات ءُ گیراں پہ ما پَش گیج اَنت کہ آیانی یات مُدام مردم ءَ بے تاھیر کن اَنت ءُ پہ جیڑگ ءَ لاچار کن اَنت، انچو گوش اَنت بنی آدم داں ھما وھد ءَ زندگ بیت داں کہ آئی ءَ ساہ مان اِنت بلے لھتیں مردم ھست اَنت کہ مرگ ءَ پد ھم کُلّیں جھان ءَ زندگ بنت، آ ھما مردم بنت کہ وتی زند ءَ لھتیں انچیں کار کن اَنت کہ آ مرگ ءَ رند بلکیں تھنا وتی کھول ءِ دل ءَ ناں بلکیں کُلّیں جھان ءِ دل ءَ زندگ بنت ءُ چو درپشوکیں استال ءَ درپشان اَنت، مرچی بلکیں اے وڑیں مردم یکے یا دو نہ اَنت بلوچستان ءِ تہ ءَ ھزارانی کچ ءَ اے وڑیں مردم ھست اَنت کہ آ مرچی چو درپشوکیں استال روک اَنت ءُ درپشان اَنت۔۔۔ اے ھما مردم بنت کہ پہ راج ءِ باندات ءُ گُلزمین ءِ آجوئی ءَ وتی ساہ ءُ سراں چہ سر گوز اَنت ءُ وتی دوستیگیں ساہ ءَ ندر کن اَنت، آ چونیں کہ راجے بہ بیت آ داں وتی گُلزمین ءُ وتی راج ءِ وشھالی ءَ پہ وتی ساہ ءُ سراں ندر مہ کن اَنت ھچ وڑ ءَ وشھالیں زند گوازینت نہ کنت، آدگہ راجانی وڑ ءَ مرچی بلوچ راج ھم پہ وتی راج ءِ آجوئی ءُ وشھالیں زند ءِ گوازینگ ءِ ھاتر ءَ گوں پاکستانی لشکر ءَ جنگ کنگ ءَ اَنت ءُ وتی سرانی دیمونی ءَ دیگ ءَ انت۔۔۔ "مھر" انچو گوش اَنت کہ مھر ھما چیز اِنت کہ آ مھر گوں بنی آدم ءَ بہ بیت یا کہ گوں گُلزمین ءَ بہ بیت گڑا آئی ءِ مھر ءِ لوٹوک داں وتی زند ءِ گُڈّی ساھتاں آئی ءَ دوست داریت ءُ ھر وڑیں سکّیانی دیمپانی ءَ کنت بلے وتی مھروان ءَ یل نہ کنت، اے ھمے مھر اِنت کہ بلوچستان ءِ ورناھاں گوں وتی گُلزمین ءَ بوتگ کہ وتی ساہ ءُ سراں سرگوزان اَنت ءُ وت ءَ کربان کنگ ءَ اَنت، اے مھر ءِ پِڑ ءَ سد ءُ دو سد ناں بلکیں لکّانی کچ ءَ ورنا ءُ کماش ھوار اَنت کہ آیاں وتی ساہ ءُ سر پہ گُلزمین ءَ ندر کرتگ اَنت ءُ راجدپتر ءَ وتی نام اش زندگ کرتگ، مرچی چو درپشوکیں استال ءَ کُلّیں جھان ءَ چو درپشان اَنت ءُ پہ وتی راج ءِ باندات ءَ یک رُژنائیں سھبے گوں وتی ھوناں سمبھینگ ءَ اَنت۔۔۔ مرچی من چہ ھما درپشوکیں استالاں یک استالے ءِ نام ءَ آرگ لوٹاں کہ آ گوں وتی سالونکی مُراداں وت ءَ گوں وتی ھمبلاں پہ گُلزمین ءَ ندر کرت ءُ چہ اے بے وپاھیں جھان ءَ رپت ءُ یک دوریں دیار ھنکین ئِے کُرتگ انت، چہ ھما درپشوکیں استالاں یک استالے شھید یوسپ پنام دودا جان اِنت کہ 30 جنوری 2020 ءَ ماں کیچ ءِ ھند بُلیدہ ءَ گوں وتی پنچ ھمراھاں دژمنیں لشکر ءُ کُشندہ ٹولی ءِ کارمنداں گوں دیم پہ دیمی جنگ ءَ شھید بیت۔۔۔ شھید یوسپ پنام دودا جان بلوچستان ءِ دمگ ھزدار ءِ ھند نال ءِ جھمنند اِنت، شھید دودا جان کسانی ءَ وانگ وتی میتگ ءَ دربرتگ ءُ دیمتر ءَ وانگ ءَ پہ مزنیں شھر ءَ ھم شُتگ، وانگ ءَ پد پہ کار ءَ دبئی ءَ شُتگ بلے آئی ءِ لوٹ ھمے بوتگ کہ من پہ وتی راج ءُ گُلزمین ءَ ندر بہ باں، لھتیں وھداں پد چہ دبئی ءَ واتر بوتگ ءُ 2012 بلوچستان آجوئی ءِ سنگر بی ایل ایپ ءَ ھوار بیتگ ءُ سلاہ بند بیتگ ءُ جھد ئِے بندات کرتگ ءُ وتی گَل ءِ کاراں گوں شرّی ءَ دلگوش بیتگ، داں دو سال ءَ پد بزاں کہ 2014 ءَ بلوچ راجی لشکر بی ایل اے ءَ ھوار بیتگ ءُ داں ھشت سال ءَ گوں بی ایل اے ءَ بندوک بوتگ ءُ جتاھیں ھنداں جنگی سنگراں گوں وتی ھمبلاں شریں وڑے ءَ وتی ھک ئِے پیلو کرتگ ءُ وتی پگر ءَ چہ گل ءِ یک نامداریں باسکے زانگ بوتگ ، شھید یوسپ پنام دودا جان گوں وتی گل ءِ باسکاں ھوار ھمک مردم ءَ گوں پُرمھریں بچکنداں زاھری ئِے دات ۔۔۔۔۔ ھشت سال ءَ پد سال 2020 ات اولی ماہ ءِ 30 جنوری ءِ روچ ءِ ادار یک ءَ ھالے شنگ اَت کہ کیچ ءِ ھند بُلیدہ ءَ پاکستانی لشکر ءِ جوڑ کرتگیں کُشندہ ٹولی ءِ کارمندانی ءُ سرمچارانی میان ءَ یک تُرندیں جنگے برجاہ بوتگ ءُ ھمے ءَ جنگ ءَ کُشندہ ٹولی ءِ لھتیں کارمند مُرتگ ءُ پنچ سرمچار شھید بوتگ بلے انگت آوانی نام زانگ نہ بوتگ انت، اے ھال ءِ سر بوگ ءَ کُل مُردم بے چاڑ بوت اَنت، داں شپ ءِ ساھت ھشت ات کہ دگہ ھالے شنگ بوت کہ بُلیدہ ءَ جنگ ءَ شھید بوتگیں مردمانی پجار شھید یوسپ پنام دودا، شھید ناجد پنام سلیم، شھید دولت رسول پنام باران، شھید شکیل پنام ماما جیئند، شھید میران پنام داد جان ءِ ناماں زانگ بوتگ اَنت، 30 جنوری ءَ سالونکیں شھید ناجد جان ءُ شھید دودا جان گوں وتی سَے ھمبلاں پہ گُلزمین ءَ دوبر سالونک بوت ءُ رپت اَنت۔۔۔ اے مھر ءِ پِڑ ءَ اے جنگ ءَ ھواریں ھزاراں ورنایں سر نمیران بوتگ اَنت ءُ ھزاراں ورنا ءُ کماش دہ سالاں گیش اِنت کہ زندان ءِ تھاریں کوٹیاں بندیگ اَنت ءُ آزاراں وتی جان ءَ سگّگ ءَ اَنت، اے گلزمین ءِ مھر انت کہ وتی دیوانگاں امبازاں زُور انت ،اے گُلزمین ءِ آشک اَنت کہ وتی ساہ ءَ سرگوز اَنت ءُ وت ءَ کُربان کن اَنت۔۔۔۔