دْروت گُلیں ھمبل! چہ دْروت ءَ پد منی گوں پاکیں ھاوند ءَ دُوا اِنت کہ ترا ءُ کُل نمیرانیں سنگتاں وتی گُلباگ ءَ جاہ بِہ دنت ءُ پہ ما مُھکمیں توکلے ءِ رنگ ءَ مُدام سھرا بِہ کنت، چی ءَ کہ اے شُمئے دابیں سرانی داتگیں دیمونیاں کہ مارا دیم ءَ گام جَنَگ ءِ سِکین ءُ ھاٹیگ اِش بکشاتگ۔۔۔۔۔۔۔۔۔
شے مُریدیں شھمیر! تئی رَوگ ءِ ٹپّ تاجگ اَت کہ مارا دِگہ بازیں ھمبلے ءَ نوکیں ٹپّ ءُ دور بکش اِت ءُ رپت ( نمیران بوت اَنت ) اَنت، راجپھازیں آجوئی ءِ جنگول بالی جان، بے تواریں تاھِیر جان، کُنگُریں سمیر جان، پُرمھریں ھمّل جان ءَ پروم ءِ دِلبند ءَ وتی سُھر چکّیں ھون رِتک اَنت ءُ پہ ما ھمے کلوہ نبشتگ کُتگ کہ نوں اے گْرانیں بار شُمئے کُوپگان اِنت، اَچ ما رند پہ جزم شُما اے راجی جُنز ءَ پہ آیوکیں پدریچ ءُ مِنزل ءَ سر کن اِت، بلے من گوں تچکی ءَ گْوش آں کہ اے راستے گْرانیں بار مئے کُوپگان اِنت۔۔۔
۔بلے چوشیں توانے منی بالاد ءَ را مان نیست کہ من بالی جان ءُ آئی سنگتانی رنگ ءَ اے جُنز ءَ مُھکم بِہ کن آں، ھَو! " ھر مُرگ بال ء وت "، من اُوں وتی کدّ ءَ۔۔۔۔۔۔۔۔۔۔
ھانُلیں گُلزمین ءِ شے! ھمے رنگ ءَ پروم ءِ دِلبند ءَ رِتکگیں ھونانی ملپد ھُشک نہ اِت اَنت کہ کولواہ جت ءَ کمبر پارگ گوں وتی نُھ راجی جنگولیں سنگتاں ڈیھ پاسپانی ءِ جنگ ءَ ابدمان بوت ءُ تاجگیں ٹپّ گیش آزُردگ کُت، اے ھبر ءَ من جْوانی ءَ زان آں کہ اے راہ ءَ وشّی ءُ شادمانی ءِ ھمراھی ءَ درد ءُ آچشیں گم ھم مردُم ءِ بالاد ءَ اَمباز اَنت، بلے ڈیھ ءُ راج ءِ گم اِنت کہ مات ءِ تنگوئیں بچّ ھرروچ پہ ابدمانی ءَ وتی گاماں دیم ءَ جنان ءُ جُنزان اَنت۔۔۔۔۔۔۔۔۔
گُلزمین ءِ مھروانیں پُسّگ! ھمے رنگ ءَ دُژمِن ءِ گوم ءَ پہ جْوانمردی جنگ کنان ءَ ناکو ساربان، بالاچ ءُ دِلسرد ءِ ماں مکّی ءِ مھلبیں دِلبند ءَ ابدمان بُوَگ ءِ اِھوال کہ رست چہ دِل ءِ دمکاں بے تاھِیریں دردے چست بوت ءُ ھیالانی جھان ءَ وڑ وڑیں تْرانگاں سرکشّ اِت، بلے ھبر پد ءَ ھما کَیت کہ راجی آجوئی ءِ دگ ءَ انگت دیمونی دَیَگ ءِ واستا ساجو بُوَگی اِنت دانکہ بدواہ اَچ مئے ڈگار ءَ در بئیت ءُ پہ دائِمی اِیمنی ءِ کوش بِہ کشّ اِیت۔۔۔۔۔۔۔۔
نمیرانیں شے! اے دیمونی ءِ دگ ءَ ما رھادگ اِت اِیں کہ ناگت ءَ ناوشیں ھالے ءَ توامیں کولواہ وتی امبازاں زُرت ءُ مارا یک انچیں گمے شکسات ءُ مئے دِلبند ءَ کاٹارے جت کہ آئی ءِ درد داں زندگاں ابید ء آجوئی ءَ درمان نہ بیت۔ آ ناوشیں ھال ھمیش اَت کہ وپا جان ( میجر آسمی وپا )، سپر جان، شِکاری جان ( پیرُک)، اُمر جان، شِکاری کُمک جان ءُ واجہ سیٹّ دینار مردوریں جت ءَ گوں لگوریں دُژمِن ءَ جنگ دات ءُ نمیرانی ءِ جام نوش کُت، ھمے دیمونی ءِ برورد ءَ راجدپتر ءِ کِرمزیں تاکانی بھر جوڑ بوت اَنت کہ مرچی بلوچ ءِ ھر زھگ آیانی سر ءَ پھر بند اِیت ءُ پہ شرپ ناماں گیر کار اِیت۔۔۔۔۔۔۔۔۔۔
دیدگیں شے! دِگہ گپّے تو زان ئِے۔۔۔۔۔۔؟ شُمئے رَوَگ ءَ پد گُلیں زِربار ءِ کوہ ءُ دمگ ابیتک ابیتک اَنت، ءُ شُمئے جُتائی ءَ نہ سگوگیں ساز جَنَگ ءَ اَنت۔۔۔۔۔۔۔ شے جان! ترا منی اے نِمدی کہ سر بوت، گُڑا نمیرانیں کُلیں ھمبلاں سلام بِہ دے ءُ بِہ گْوش شُمئے رَوَگ ءَ مارا رنجینتگ، بلے مُھکمے کُتگ۔۔۔۔۔۔۔ کُنگُریں شے! نوں چہ ھمد ءَ من وتی نِمدی ءَ ھلاس کن آں۔۔۔۔
تئی کستِریں سنگت یاگی بلوچ
