اے چونیں ھاموشی یے، اے ھاموشی بنی آدم ءَ ایر بارت، بے تواری ءِ توار ءَ ابید دگہ ھچ نیست، میتگ، مردم، دلوت، درچک ءُ دار تھاریں بے تواری ءِ زر ءِ تہ ءَ بُکگ ءَ انت ۔۔۔ گوات ھم کشک ءَ انت بلے گوں ہے تواری ءَ چول جنان انت ءُ دیم ءَ روان انت ۔۔ اد ءِ مردم چونیں مردم انت ، یکے دومی ءَ چار انت ءُ گوز اَنت ءُ رو اَنت۔ گپ ءُ ھبر نیست، بنی آدم ءِ تِرک ءُ توار نیست، بلے ھر نیمگ ءَ چماں شانک دے ات مردم انت۔
مردین، جنین، کسانیں زھگ ءُ کماش، بنی آدمانی جنگل انت بلے هاموشی انت. میتگ ءِ مردم وتی ھر روچیگیں کاراں گوں دزگٹ انت، کسانیں چک گوں وتی لیب ءُ گوازی ءَ بلے بے ترک ءُ توار، اے سرجمیں شھر گُنگ انت ۔؟؟؟ انسانی آبادی ءِ انچوکیں مچی یے چون سرجم ءَ گُنگ بیت کنت، ایشانی دپ ءَ زبان نیست ؟ کے ءَ پلیتگ اشانی زبان ۔۔۔۔؟
اے کجام دنیا انت ۔۔۔۔؟ اے ھمے زمین انت کہ دگہ باز شھر، میتگ ءُ مردم ایشی سر ءَ آباد انت،، بلے آیاں گویاک ھست،، گڑا اے شھر پرچا چو بے توار ءُ بے گویاک انت ۔۔۔۔۔؟ اے انسان نہ انت ۔۔۔؟ اے دگہ جھانانی اتکگیں مھلوکے۔۔۔؟ اے بے گویاکیں مھلوک چه کجام جهان ءَ اتکگ ۔۔۔؟
اے ردی کُدرت ئیگ انت ۔۔۔؟ اے مھلوک چہ ھدا ءِ نیمگ ءَ بے گویاک انت ۔۔۔؟ اے چونیں شھرے، ھر نیمگ ءَ تھاری انت... بے گویاکیں مردمانی شھر ءَ نوکیں ابد ءِ بنی آدمے ءِ سر کپتگ انت ۔۔۔ کّیا،،،،،، ات آئی ءِ نام۔ ھر نیمگ ءَ مردم انت، بلے بے گویانیں ، ھرکس گوں وت انچو دلگوش انت کہ کس ءَ کسی سما م نیست ۔۔۔ دور یک مچی یے روگ ءَ انت ،،،
کیا تچان ءَ رند ءِ کپت،، مچی ءِ دیما مان تر اِت، جستے گپت ، شما کجا روگ ءَ اِت ؟ درست کیّا ءَ چارگ لگ ات انت۔ کس ءَ پسو نہ دات۔۔۔۔ کس ھچ نہ گش اِیت ، انچو سما بیت کہ لبز پہ آیاں نوکیں چیزے ات انت۔
کس کیّا ءِ دپ ءِ لبزاں سرپد بوگ ءَ نہ ات اَنت۔۔ درست روک روک ءَ کیّا ءِ نیمگ ءَ چارگ ءَ انت بلے پسو نیست... کیّا ابکہ بیت،، پشت ءَ کنز ایت،، جیڑگ ءَ بندات کنت۔۔۔ اے وڑ چون بوت کنت که درست چم پچ انت،،، بلے کسے ءِ چمانی تہ ءَ زندگیں بنی آدمی روک مان نیست ۔۔۔
آئی ءَ انچو گمان بیت کہ آ مردگے ءِ چمانی تہ ءَ چارگ ءَ انت منی سر کجا کپتگ۔۔۔؟ نا، ، اے آگھی بوت نہ کنت،،،، الم اے وابے۔ کیّا ءَ بنی آدم ءِ درتکگیں جون ءِ نیمگ ءَ چار ات، اے کے انت، اے مارا چہ یکے بلے پرچا۔۔۔۔؟ پرچا اے اد ءَ در اَتکگ۔۔؟ پرچا ایشی ءَ کس پجا نیار اِیت۔۔۔؟
ھمے جست ءُ پسوانی گڑ ءُ منج ءِ تہ ءَ کیّا ءَ مار ات کہ آئی ءَ سک دمبرتگ ۔۔۔۔۔ آئی ءَ نو چد ءُ گیش وتی پادانی سر ءَ اوشتگ ءِ ھاٹیگ نیست، آئی ءَ چم چست کت انت میتگ ءِ چاریں نیمگاں چار ات ۔۔۔ ھاموشیں لوگ،،،، مردم کس درا نہ بیت ،،، بے تواری انت ،،، تھاری انت ،،، شپ ءِ سیاھی ءَ میتگ چو سیاہ مار ءَ پتاتگ ءُ واب انت۔ کیّا ءَ انچو مار ات کہ آئی ءَ چد ءُ گیش وسواس کت آ گنوک بیت۔ ھمے درچک ءَ کہ آ بنی آدم ءِ جون درتکگ اَت کیّا ءَ ھمے درچک ءَ تِکّو دات نشت۔ جون ءِ چم پچ انت،، سرجم ءَ ٹپّی،، ٹپ اَت چہ زگریں ھون درایگ ءَ ات ءُ زمین ءِ سر ءَ پٹّگ انت۔۔۔۔
کیّا نشت، ھمے ھونانی چارگ ءَ لگ اِت کہ زمین ءِ ھاکانی سر ءَ شیپ گران ات انت۔۔۔ اے ھون کئیگ انت کہ ریچگ بوگ ءَ انت ۔؟ کیّا ءَ جیڑ ات۔۔۔۔۔ من ءَ کئے پسـو بہ دنت۔۔۔ ؟ سرجمیں میتگ و بے زبان انت۔۔۔ اے میتگ ءِ مردم کئے ءَ چوں بزّگ کتگ انت۔۔؟ ایشانی گویاک۔۔ ؟؟؟ پرچا ھچ نہ گش انت،، اے کھریں بے تواری اشاں بیگواہ کنت،،،
اے چون زندگ بوت کن انت ؟ زندمان ءِ جنگجاہ ءِ جنگ ءَ اے چون برجم داشت کن انت۔۔ ؟ کیّـا ھمے جیڑگانی زر ءَ کپت دور ءَ داں اوژناگ کنان ات گوں چولاں بک وران ات کہ واب ءِ بوجیگ ءَ سوار بوت ۔۔۔۔ ھمے درچک ءِ چیر ءَ واب کپت۔ رژن ءِ لھمیں مارشت وھدے کیّـا ءِ دیم ءَ کپت کیّا ءَ بست کت۔۔ آئی ءَ شپ ءِ سرجمیں کسہ بےبیھال ات کہ اناگہ ءَ آئی ءِ چم وتی دیم ءَ درتکگیں بنی آدم ءِ جون ءَ کپت انت۔
آ ابکہ بوت ءُ شپ ءِ تھاری انت ءُ تواری ، بے گویاکیں بنی آدمانی کسہ آئی ءِ تہ ءَ ایر رتک انت،،، کیّا، اشتاپی ءَ پاد اتک ءُ اشتات،،،،،،، جیڑگے بندات کت کہ اے وابے نہ بوتگ آگھی بوتگ، چاریں نیمگاں چارگے بندات کت،،،،، کیّا گڑ ات،،، پشت ءَ کنز ات، کیّا ءَ دیست کہ سرجمیں میتگ ءِ مھلوک،، جنین، مردین، کسانین زھگ ءُ کماشانی ٹپّی ئیں جون درچکانی سر ءَ درنجوک انت۔ کیـّا ھیران ات،،، مردم پد۔ءَ دیم ءَ جنزاں بیت انت،،،،،،
کیّا ھاموشی ءَ گوں آیانی پشت ءَ روان بیت کمو دور گریشگے ءِ نزدیک ءَ رست اَنت ، اوشتات انت۔ کیّا ءَ وت ءَ آیانی کر ءَ سر کت چار اِیت سرجمیں مردم اشتوک انت - یک درچکے ءَ گوں درتکگیں بنی آدم ءِ لاشے ءِ نیمگ ءَ چارگ ءَ انت۔
