راجانی تہ ءَ یکجاہ ءُ یکمشتی بلاھیں ارزشتے دار اِیت راجانی ءَ تہ ءَ اے المی اِنت کہ یکجاہ بہ بنت۔ یکجاہ ءُ یکمشتی انچیں زوریں تاکتے ھروڑیں مزن ءُ زوراوریں ریاستے بہ بیت آئی ءَ پروش دنت آئی ءِ تاکتاں نیست ءُ نابود کنت آ راج ھچ وڑ سوبمند نہ بنت آیانی توک ءَ یکجاہ ءُ یکمشتی مہ بیت۔
مرچی اے ناپاکیں ریاست مئے سر ءَ وتی زوراکیاں کنگ ءَ اِنت ایشی ءِ مستریں سوب مئے جتائی ءُ گستائی اِنت اگاں مروچی ما یکجاہ ءُ یکمشت بوتین اِیں گڑا اے پلیتیں ریاست ءَ ناں جھان ءِ ھچ ریاست ءَ مارا پروش دات نہ کت بلے مئے یکجاہ نہ بوگ ءِ سوب ءَ مارا اے جاور ءَ آؤرتگ ءُ سر کرتگ انگت ما ھور ءُ یکجاہ مہ بہ اِیں گڑا ریاست وتی زلم ءُ زوراکیاں گیش کنت ۔ ریاست ءِ زوراکیانی مستریں دوا ھمیش اِنت مارا لس مھلوک پت ءُ کماش، مات ءُ گھار، برات ءُ جوان ، زھگ ءُ تپل بلوچستان ءِ سرجمیں مھلوک ھور ءُ یکجاہ بہ بہ اِیں گڑا مئے ھوری اے ریاست ءِ زلمانی کلاتاں پروش دنت ۔
کیچ ءَ چہ پاد اتکگیں بلوچ ءِ کاروان ءَ مرچی سرجمیں بلوچستان ءِ راج پاد کرتگ ءُ ریاست ءِ زلم ءُ زرواکیانی ھلاپ َ گھگیری کنگ ءَ اَنت باید ھمیش اِنت کل بلوچ ھروھد ءَ ھمے وڑ ھور ءُ یکجاہ بوتین اَت گڑا اے زلمانی نوبت نیتکگ ات انت بلے ریاست ھرچی کنت مارا سما نیست گوش ءَ مورے نہ وارت کس پاد نئیت الم اے نوبت مئے سر ءَ کاینت ۔ اے گھگیری ءِ مستریں سوب مئے یکجاہ ءُ یکمشتی اِنت دانکہ ما یکجاہ ءُ یکمشت نہ بہ اِیں سوبین نہ بہ اِیں ۔
اگاں ریاست ءَ آئی ءِ زلماں زوراکیاں پروش دیگ لوٹ اِت گڑا سرجمیں بلوچ راج ءَ پاد آیگی اِنت ءُ یکجاہ ءُ یکمشت بوگی اِنت پرچاکہ یکجاھی ءَ ملک ءُ راج آباد بنت ءُ یزیدیں لشکر ءُ ھون واریں رستر نیست ءُ نابود بنت یکجاھی ءَ بلاھیں تاکتے ھست۔ مرچیگیں کاروان کہ بلوچ ءِ باندات ءَ اِنت کہ کیچ ءَ چہ راج چست بیتگ ءُ سرجمیں بلوچستان ءَ گلامی ءُ بلوچ ءَ وش ءُ ایمنیں زندے گوازینگ ءَ گھگیری کنگ ءَ اَنت باید ھما انسان کہ گون گلزمین ءَ وپادار اِنت ماتیں وتن ءَ گوں وپاداری کنگ ءَ اِنت کل اے کاروان ءَ گون بہ جنز اَنت بانک سمی دین ،بانک ماہ رنگ ، بانک شلی بلوچ اے دگہ کل ھمراہ ءُ ھمبلانی اے جھد ستا کرز اِیت کہ پہ باندات ءَ بلوچ ءِ زندگ کنگ ءِ جھد ءَ انت۔
بانکاں ءُ براتاں ءُ گوھاراں اے مارا پیش داشتگ ءُ سر کتگ مئے جند گلام ءُ مئے زند گلام مارا نی وتی سرزمین ءِ سر ءَ نندگ ءُ زندگ بوگ ءَ ریاست نیل اِیت بلوچ ءِ زندگ بوگ ءِ ھاتر ءَ کاروان جنزگ ءَ اِنت ۔ کلانی جھد ءَ سلام اِنت بلوچ راج یکجاہ ءُ یکمشت بات۔
