سند: سکرنڈ ( نوابشاہ ) ءِ میتگ ماڑی جلبانی ءَ گوستگیں روچ ءَ پاکستانی لشکر ءِ دست ءَ پنچ سندی دھکانکار ءِ کوش ءِ بگیری ءَ مرچی دو روچ اِنت کہ سرجمیں سند ءَ زھرشانی برجاہ اَنت۔ پنجاپ ءَ روکیں درسیں راہ بند اَنت۔
اھوالکار ءِ رد ءَ گوستگیں روچ ءَ سکرنڈ ( نوابشاہ ) ءِ ھند ماڑی جلبانی ءَ پاکستانی لشکر، چیریں ادارھانی کارمند ءُ پولیس ءَ بازیں کچے ءَ بیڑ برتگ ءُ گس پٹ ءُ پول کرتگ اَنت۔ مردمان ءَ گساں پترگ ءَ نہ اشتگ ءُ تیرگواری کرتگ چار سندی دھکانکار اکن جلبانی، نزام الدین جلبانی، میھار جلبانی ءُ سجاد جلبانی جاھی بیران بیتگ اَنت ءُ دگہ ھپت ءَ گیش مردم مرد ءُ جنین ٹپی بیتگ اَنت۔ آیانی جاور ناگیگ بیتگ اَنت پہ درمان کنگ ءَ چہ نوابشاہ ءَ کراچی ءَ دیم دیگ بیتگ اَنت۔ چہ ٹپی بیتگیں مردماں یک کماشے ءَ نادراھجاہ ءَ ٹپانی درد نہ سگ اِتگ اَنت ءُ بیران بیتگ۔
پاکستانی رینجر ءَ وتی شنگ کرتگیں درشان ءَ ٹاپار جتگ ءُ گوشتگ کہ سندھودیش روولیوشنری آرمی ء جنگولانی ھال ءِ رسگ ءَ لشکرکشی کرتگ۔ بلے ھندی مردماں رینجر ءِ اے درشان رد کرتگ۔
میتگ ءِ مردمانی گوشگ اِنت کہ پاکستانی لشکر ءَ سند ءِ راجدوستیں سروک چاچا رجب جلبانی ءِ گس ءُ میتگ ءَ بیڑ برتگ ءُ تیوگیں میتگ ءِ مردمانی سر ءَ تیرگواری کرتگ۔
پاکستانی لشکر ءِ زوراکیانی بگیری ءَ سند ءِ سیاسی گلانی نیمگ ءَ زھرشانی کنگ ءِ جار ءِ پد ءَ دو روچ اِنت کہ تیوگیں سند ءَ زھرشانی برجاہ اَنت۔
بنشون: اھوالکار / اکس: اھوالکار