بلوچ راجی زْرمبشت ( بی این ایم) ءَ بلوچانی زور بیگواھیانی جیڑہ ءِ سھرا کنگ ءَ جرمنی ءِ جتائیں شھران زھرشانی ءُ آگاھی باوست برجم داشتگ۔ اے مراگش کلن ءُ کیمینتس ءَ بیتگ اَنت۔ مراگشاں بی این ایم ءِ باسکانی پجیگ ءَ بلوچ مردمی گل ( بی آر پی) ءِ باسک ءُ ھندی اگدہ داراں ھم بھر زرتگ ءُ گوں اے مول ءَ وتی ھمدلی ءِ درشان کرتگ۔
باوست ءِ میان ءَ ، زھرشانی کنوکانی لوٹ بلوچستان ءِ ناگیگیں جاور ءُ زور بیگواھیں مردمانی داں سالاں زندانی کنگ ءُ آزار دیگ ءِ بارہ ءَ سرپدی ودی کنگ اَت۔ بی این ایم جرمنی کارگشاد جبار، کمک کارگشاد شرھسن ، این آر ڈبلیو بنزہ ءِ کارگشاد بدل ھان ، بی آر پی جرمنی رسانکدری تْرامکار ابدل جلیل ، آسپ ، سادک ، سپیا ، کاسم ھسین ءُ آپتاب ءَ گوں مچیاں تْران کنان میان استمان ءَ زور داتگ کہ آ بلوچستان ءَ مردمانی آزاردھی ءُ زوراکی آسر کنگ ءَ کمک بہ کنت۔
مراگش ءِ تْرانکاراں بلوچستان ءَ برجاھیں زوراکی ءِ بن پاکستانی زورگری لیک اتگ ءُ گْوشتگ 1948 ءَ پد وھدے پاکستانی لشکر ءَ بلوچستان زور گیپت ، چہ ھما روچ ءَ بلوچ راج بے کچیں جیڑھانی دیمپان اِنت۔چہ ھما روچ ءَ پاکستانی مھترھند بلوچ راج ءِ سر ءَ یکشل ءَ زوراکی کنگ ءَ اِنت ءُ مردمی اگبالانی بگیریانی تہ ءَ گیشی اتکگ۔ زور بیگواھیں بلوچانی توار ( وی بی ایم پی ) ءِ رد ءَ، گْوستگیں دو دھکاں چہ بلوچستان ءَ 45000 ءَ گیش مردم زور بیگواہ کنگ بیتگ۔
آیاں زوراکیانی ناگیگیں جاور ءِ نیمگ ءَ دلگوش پرینتگ ءُ گْوشتگ انیگ ءَ ملتان ءِ نشتر نادْراھجاہ ءَ 500 ءَ گیش ژانگولیں کنٹ ءِ درکپگ ءَ جاور گیشتر سنگین بیتگ اَنت۔ سکا گمان کنگ بیتگ کہ اے کنٹ زوربیگواھیں بلوچانیگ اَنت کہ پاکستانی لشکر ءَ جتائیں وھداں آوار جتگ اَنت۔ بلوچستان ءَ پاکستانی لشکر ءِ زور ءُ بالادستی رسانکدر ءَ چہ ھال ءُ ھبراں سر بیگ ءَ دارگ ءِ پد ءَ ’ رسانکدری سیاہ چالگے ‘ (میڈیا بلیک ھول ) جوڑ بیتگ۔ دری اھوالکار ءُ رسانکدری جھگیراں ھم دمگ ءَ روگ ءَ نہ ھل اَنت۔ بلوچستان ءَ برجاھیں جھد ءِ نیمگ ءَ دلگوش دیان تْرانکاراں گْوشتگ بلوچ راجی زْرمبشت ( بی این ایم ) ءُ بلوچ مردمی گل ( بی آر پی ) بلوچستان ءَ برجاھیں مردمی اگبالانی بگیری ءُ زور بیگواھیانی سر ءَ توار چست کنگ ءَ اِنت۔
آ چہ یورپی سنت ءُ میان استمان ءَ لوٹ کن اَنت کہ آ دزمانجنی بہ کن اَنت ءُ چہ توار ءَ زبھریں بلوچ راج ءِ توار جوڑ بہ بہ اَنت، بلوچ گل چہ درسیں دودمانداریں راج ءُ مردماں زور دے اَنت کہ آ پاکستانی لشکر ءِ اے در مردمی آزار دھی ءِ بگیری ءَ پاد بہ یا اَنت۔
بنشون: درشان / اکس: بی این ایم
