ریڈیو زْرمبش بلوچی | ریڈیو زْرمبش بلوچی

روکپتی بلوچستان: چھبار ءَ 21 ستمبر ءَ پنچ شمبے ءِ روچ ءِ سَے ءَ چھبار بلوچی لبزانکی گل ءِ باسکاں بلوچی زبان ءِ نمیرانیں راجی لچہ کار ءُ جھدکار مبارک کازی ءِ نمیرانی ءِ درگت ءَ مراگشے ءِ برجم دارگ ءَ سلاہ ءُ سَوَڑگی نیادے برجم داشتگ۔

نیاد ءِ گُڈّسر ءَ گل ءِ باسکاں گوں ھم سَنّتی ءَ جار جتگ ءُ گْوشتگ کہ نمیرانیں راجی لچہ کار مبارک کازی ءِ نمیرانی ءِ یات ءِ دیوان دیم ءِ پنچ شمبے ءَ 28 ستمبر ءِ بیگاہ ءِ 4 ءَ برجم دارگ بیت۔

آیاں گْوشتگ کہ دیوان ءَ ڈیوا روک کنگ بیت ءُ دیوان چھبار ءِ ارشاد اسلامی ءِ دیوانجاہ (مجتمع فرھنگی و ھنری ارشاد اسلامی چھبار) گلشھر ءَ برجم دارگ بیت۔

دیمتر ءَ آیاں گْوشتگ کہ دیوان دو بھرانی تہ ءَ بیت، اولی بھر ءَ مبارک کازی ءِ ازم ءُ پجّار ءِ باندات ءَ گوشتانک دیگ بیت ءُ دومی بھر لچّہ کاری ءِ بھر انت ءُ اے بھر ءِ تہ ءَ لچہ کار وتی لچھاں پہ دیوان ءِ نشتگیں مردماں درشان کن انت۔

بنشون: اھوالکار / اکس: اھوالکار